Йæ райдианæй фæстæмæ республикæйы скъоладзаутæ сæхи фæлварынц ирон хойрæгтæ кæнынæй
Нырыккон царды адæмон æгъдæуттæ æххæст кæнын, фæсивæды национ культурæмæ, ирон бæрæгбæттæм цымыдис кæнын, мадæлон æвзагмæ уарзондзинад æвзæрын кæнын. Ацы хъуыддæгтæ сты национ фестиваль «Фыдæлты фарн»-ы сæйраг хæстæ. Фестиваль бацыд йæ тæмæны. Ацы аз арæзт æрцыд 7-æм хатт. Йæ райдианæй фæстæмæ республикæйы скъоладзаутæ сæхи фæлварынц ирон хойрæгтæ кæнынæй. Раздæр уал ерыс кодтой нæртон бæгæны фыцынæй. Ныр та се ргом аздæхтой ирон кæрдзынтæм. «Фыдæлты фарн » ахæсдзæн 2-æм декабрьмæ. Фидараты Маринæ радзурдзæн бæстондæр.
Хистæртæ куыд фæкувынц, афтæ традицион куывды сæхи бафæлвæрдтой кæстæртæ. Æмæ цалынмæ лæппутæ аив дзырдæй ерыс кæнынц, уæдмæ чызджытæ та архайынц ирон кæрдзынтæ кæныныл. Уыимæ куыд хуымæтæг тымбылтæ, афтæ æртыдзыхæттæ дæр. Эксперттæ та сын сæ алы фезмæлдæн дæр кæнынц аргъ.
Лæппутæ æмæ чызджытæ сæ зонындзинæдтæ канд культурæйæ не вдисынц, фæлæ ма сæ тых æмæ хъару дæр. Хъæбысхæст æмæ боксы бæсты ацы хатт сæхи бафæлвæрдтой ирон традицион хъæзтытæй.
Уæвгæ ерыс ам банкъарæн ис алы ран дæр. Фæсивæд архайдтой жюрийы раз сæхи иттæг хорз равдисыныл. Иутæ сæ сæрæндзинадæй, иннæтæ та се сфæлдыстадон арæхстдзинадæй. Скъоладзаутæ ма сæхи бафæлвæрдтой æндæр компетенцийы дæр – æрмдæсныйады. Сæ алы куыст дæр баст уыд Ирыстоны бирææнусон историимæ. Афтæмæй 800 скъоладзауæй фылдæр бацархайдтой 7-æм национ фестиваль «Фыдæлты фарн»-ы.
Базарадон экономикон колледж йæхимæ лвасы алкæйы дæр, уæлдайдæр та ирон культурæ, æгъдæуттæ æмæ традицитæ зæрдæйæ чи уарзы, уыдоны. Фестиваль фæуыдзæн 2-æм декабры. Хуыздæрты схорзæхджын кæндзысты зæрдылдарæн лæвæрттæй æмæ кады гæххæттытæй.
