Объекттæ бабæрæг кодта нæ республикæйы физкультурæ æмæ спорты министры рæстæгмæ æххæстгæнæг Хуадонты Артур
Физкультурæ æмæ спортмæ нæ республикæйы цæуы æмбæлгæ цæстдард. Ныртæккæ Цæгат Ирыстоны аразынц цалдæр физкультурон-дзæбæхгæнæн комплексы. Дарддæр арæзтадон куыстытæ цæуынц стадион «Спартачы» дæр. Объекттæ бабæрæг кодта нæ республикæйы физкультурæ æмæ спорты министры рæстæгмæ æххæстгæнæг Хуадонты Артур. Йемæ уыд не сфæлдыстадон къорд дæр. Бæлвырддæр хабæрттæ радзурдзæн Чехойты Фатимæ.
Олимпаг домæнтæн дзуапп чи дæтты, ахæм нырыккон бассейн фæзындзæн Дзæуджыхъæуы. Микрорайон «Ног горæт»-ы цæуы физкультурон-дзæбæхгæнæн комплексы арæзтад. Бабæрæг æй кодта физкультурæ æмæ спорты министры хæстæ рæстæгмæ æххæстгæнæг Хуадонты Артур. Куыстытæ райдыдтой 2 азы размæ. Проектмæ гæсгæ ам уыдзæн 50-метры дæргъæн бæссейн ленкгæнджытæн аст хицæн фæндагимæ, залтæ хæбысæйхæцджытæн æмæ стъолыл теннисæй хъазынæн, трибунæтæ 600 бынатæн. Ног бассейны руаджы республикæйы арæзт цæудзысты æппæтуæрæсеон ерыстæ.
Комплексы фарсмæ аразынц æхгæд фæз футболæй хъазынæн. Ам ма кусдзысты шахмæттæ æмæ боксы секцитæ. Уымæй уæлдай, дзы уыдзæн трибунæ 150-ай бынатæн. Дыууæ объекты дæр нысан кæнынц ацы аз саразын. Арæзтадон куыстуаты сæйраг инженер Гиоты Константины ныхæстæм гæсгæ, куыстытæ цæуынц нысангонд фæткмæ гæсгæ.
Хуадонты Артур бабæрæг кодта физкультурон-дзæбæхгæнæн комплекс «Клеверспорт»-ы арæзтадон куыстыты цыд дæр. Уыдзæн 2 хайæ. Иуы дзы хъуамæ уой фитнес-центр алыхуызон тренажертимæ, залтæ хæбысæйхæцджытæн, секцитæ сывæллæттæн. Иннæйы та – дыууæ бассейны – гом æмæ æхгæд, 11 саунæ æмæ абанайы.
Ныртæккæ арæзтад бацыд йæ тæмæны: ам цæуынц монолитон куыстытæ, амайынц къултæ. Уыцы иу рæстæг цæттæ кæнынц бассейнтæ дæр. Проект конд æрцыд горæт Набережные Челныйы физкультурон-дзæбæхгæнæн комплекс «Клеверспорт»-ы бындурмæ гæсгæ. Арæзтадон куытстытæ фæнд кæнынц ног аз фæуын.
Объекттæ арæзт цæуынц национ проект «Демографи»-йы федералон программæ «Спорт – царды нормæ»-йы фæлгæты. Фæстаг 7 азы Федералон æххуысы руаджы нæ республикæйы арæзт æрцыд бирæ спортивон объекттæ.
