Домæнтæн дзуапп чи дæтты, уыцы кандидаттимæ бафысдзысты бадзырдтæ
Цæгат Ирыстоны ацы аз 24 дохтыры æмæ астæуккаг къæпхæны 2 медицинон кусæджы суыдзысты программæ «Земский доктор»-ы архайджытæ. Домæнтæн дзуапп чи дæтты, уыцы кандидаттимæ бафысдзысты бадзырдтæ. Уыдонмæ гæсгæ райсдзысты иурæстæгон фиддон. Дохтыртæн йæ бæрц у милуан сомы, фельдшертæн, акушертæн æмæ медицинон хотæн – фондзсæдæ мин сомы. Бæлвыддæр радзурдзæн Хъайтмазты Дзерассæ.
Æнæниздзинадхъахъхъæнынады къабазы хуыздæр кусæг хъæуты территориты – ахæм аргъ скодтой Горæтгæрон районы сæйраг рынчындоны эндоскопион хайады сæргълæууæг Таматы Аланæйы куыстæн Уæрæсейы æнæниздзинадхъахъхъæнынады министрады. Йе *нæзæрдæхудт фæллойы тыххæй дохтыр райста бузныджы гæххæтт Михаил Мурашкойы къухтæй, хъæуты территориты райрæзтмæ стыр æвæрæн кæй хæссы, уый тыххæй та – Уæрæсейы хъæууон хæдзарады министрады арфæ. Аланæйы йæ райдианæй дæр фæндыд дохтыр суæвын.
Дæсныйад Таматы Аланæ райста Мæскуыйы, куыста Дзæуджыхъæуы тагъд æххуысы клиникон рынчындоны. Йæ фæлтæрддзинад – 15 азæй фылдæр. Горæтгæрон районы сæйраг рынчындонмæ æрбацыд медицинон кусджытæн æххуысы программæ «Земский доктор»-мæ гæсгæ.
Дохтыры дæсныдзинад æмæ нырыккон кусæнгæрзтæ – ацы дыууæ хъуыддаджы фæрцы æнтысы адæмы цард бахъахъхъæнын. Æрæджы Горæтгæрон районы рынчындон райста ног япойнаг эндоскопион видеосистемæ. Уый руаджы тæссаг фæзындтæ рабæрæг вæййынц рагкъæпхæныл. Фæлтæрдджын дохтыр дзы ахадгæйæ пайда кæны.
Медицинон кусджытæн æххуысы программæ «Земский доктор» дарддæр æххæст кæнынц республикæйы. Царды йæ куы рауагътой, уæдæй фæстæмæ дзы бацархайдта 200 медикæй фылдæр. Фарон куыстмæ бацыдысты 24 дохтыры æмæ астæуккаг къæпхæны 2 медицинон кусæджы.
Дохтыртæн фиддоны бæрц у милуан сомы, фельдшертæн, акушертæн æмæ медицинон хотæн – 500 мин сомы. Дæрддзæф хъæуты чи кусы, уыдонæн компенсаци фæфылдæр вæййы милуан æмæ фондзсæдæйы, стæй 750 мин сомы онг. Бадзырдмæ гæсгæ программæйы архайджытæ хъуамæ 5 азы бакусой бæлвырд медицинон кусæнуаты.
