Уыцы ахсджиаг егъау мадзæлттæм куыд цæттæ кæны республикæ, ууыл æрдзырдтой сæрмагонд æмбырды
Цæгат Ирыстоны ацы аз бацархайдзæн Кавказы инвестицион форумы æмæ Санкт-Петербурджы æппæтадæмон экономикон форумы. Уыцы ахсджиаг егъау мадзæлттæм куыд цæттæ кæны республикæ, ууыл æрдзырдтой сæрмагонд æмбырды. Амыдта йæ хицауады сæрдар Дзанайты Барис. Премьер-министр бадомдта активондæр архайын, цæмæй нæ регион йæхи равдиса иттæг хорз, уыимæ алы къабæзты дæр. Фыццаг хатт нæ архайæм ахæм мадзæлтты, фæлтæрддзинад нæм ис, – загъта Дзанайты Барис. Кавказы инвестицион форум ацæуæдзæн 28-æмæй – 30-æм майы онг Минводы. Йæ сæйраг нысан темæ – «Большой Кавказ» – от моря до моря». Йæ сæйраг нысан та – Цæгат Кавказы инвестицион хъомыс фæфылдæр кæнын. Эконмикон рæзты министры фыццаг хæдивæг Олег Быкодоров куыд радзырдта, афтæмæй Цæгат Ирыстоны стенды равæрдзысты нæ республикæйы 5 ахсджиагдæр проекты пълантæ. Уыдоны фæрцы 2030-æм азмæ нæ регион хъуамæ экономикон æгъдауæй зынгæ къахдзæфтæ акæна размæ. Нысантæм гæсгæ, нæ республикæ хъуамæ уæрæсейаг компанитимæ бафысса æмгуыстады бадзырдтæ. 5-æмæй -8-æм июны онг та Цæгат Ирыстоны стыр стенд равæрдзæн Санкт-Петербурджы экономикон форумы. Баст уыдзæн нæ республикæйы юбилейон бонтимæ. 250 азы Ирыстон Уæрæсеимæ куы баиу, уый, стæй Цæгат Ирыстоны 100 азы бон. Стыр æргом аздахын хъæуы регионы амалхъом программæмæ, æмæ ног проекттыл бакусынмæ, – загъта премьер-министр. Æмбырды ма æрдзырдтой æппæтадæмон форум-равдыст «Уæрæсе»-йы архайдыл. Нæ республикæ дзы йæхи æнтыстджынæй æвдисы. Уæ зæрдыл уын æрлæууын кæндзыстæм, равдыстадон экспозици нæ бæстæйы цæрджыты зонгæ кæны Ирыстоны æгъдæуттимæ, культурæ æмæ традицитимæ.
