Цæугæ медицинон комплексты фæрцы се нæниздзинад сбæлвырд кодтой 33 мин адæймагæй фылдæр
Цæгат Ирыстоны ацы азы райдианæй диспансеризаци ацыдысты республикæйы цæрджытæн сæ 57 проценты. Цæугæ медицинон комплексты фæрцы се нæниздзинад сбæлвырд кодтой 33 мин адæймагæй фылдæр. Комплекстæ афæдзы райдианæй республикæйы районтæм ацыдысты 800 хаттæй фылдæр. Цæгат Ирыстон 10 цæугæ медицинон комплексы райста национ проект «Æнæниздзинадхъахъхъæнынад» æххæстгæнгæйæ. Бæлвырддæр радзурдзæн Хъайтмазты Дзерассæ.
Æдзух диспансеризаци у æнæниз æмæ дæргъвæтин царды бындур. Бехъаны цæрæг Лариса Китаева, алы 6 мæйы дæр сæххæст кæны профилактикон æркаст. Радон диспансеризацийы рæстæг анализтæ равдыстой Ларисæйы туджы сæкæры æмвæзады ивддзинæдтæ. Афойнадыл конд диагностикæйы фæрцы уавæр сраст кодта.
Бынæттон цæрджытæн сæ бон у ахсджиаг медицинон лæггæдтæ исын, горæтмæ ма рацæугæйæ. Мæй иу хатт сæм æрцæуы флюорограф æмæ маммограф. Ацы хатт сæ рæуджыты уавæр сбæлвырд кæнынмæ æрбацыдысты 20 адæймагæй фылдæр. Уыдонæй бирæтæ сты пенсиисджытæ – поселокæйы дарддæр цæуын сын зын у.
Ам ма фельшерон пункты поселочы цæрджытæн сæ бон у электрокардиограммæ скæнын æмæ хъæугæ анализтæ радтын.
Афæдзы райдианæй цæугæ медицинон комплекстæ республикæйы районтæм ацыдысты 800 хаттæй фылдæр, диспансеризаци та ацыдысты 33 мин адæймаджы.
Нырыккон медицинæ хæстæгдæр кæны адæммæ, суанг ма республикæйы дæрддзæф хъæуты цæрджытæм дæр. Проект «Дæргъвæтин æмæ активон цард»-ы æмæ цæугæ медицинон комплексты куысты фæрцы хъæуты цæрджытæн сæ бон у афойнадыл иртæстытæ сæххæст кæнын.
