Филармонийы байгом стыр ахъаз фæци ирон симфонион музыкæйы райрæзтæн, оркестрæй разамынд дæдтынмæ се ргом раздæхтой бирæ композитортæ
Цæгат Ирыстоны ацы бонты бæрæг кæнынц паддзахадон филармонийы 75 азы бон. Филармонийы байгом стыр ахъаз фæци ирон симфонион музыкæйы райрæзтæн, оркестрæй разамынд дæдтынмæ се ргом раздæхтой бирæ композитортæ, дзыллæттæм сæ фыст уацмыстæ чи хæццæ кодта, уыдон. Филармонийы иу æмæ дыууæ хатты нæ равдыстой се сфæлдыстад Святослав Рихтер, Тихон Хренников, Мстислав Ростропович, Эмиль Гилельс, Дудараты Вероникæ, Гергиты Валерий. Алы рæстæджы ирон филармонийы оркестрæн разамынд лæвæрдтой Павел Ядых, Сохиты Тугъан, Валерий Хлебников, Гугкаты Зауырбег. 2017 азы Ирыстоны куы сфæнд кодтой Мариинаг театры фыццаг филиал байгом кæнын, уæд филармонийы дыууæ сфæлдыстадон къорды симфонион оркестр æмæ национ зарджыты нæлгоймæгты къорд хаст æрцыдысты филиалмæ. Абон филармонийы ис Павел Ядыхы камерон ансамбль., адæмон иннструментты оркестр, музыкалон лекторий, вокалон къорд «Уацамонгæ». Филармонийы директор æмæ аивадон разамонæг у композитор, Цæгат Ирыстоны композиторты цæдисы сæргълæууæг, УФ-йы аивæдты сгуыхт архайæг Махъоты Ацæмæз.
