Ирыстойнаг дыууæ майданы хицæуттæ сты Авиамоделон спорты Уæрæсейы æрыгæтты иугонд командæйы уæнгтæ
Цæгат Ирыстоны авиамоделисттæ фæуæлахиз сты Уæрæсейы Кубок рамбулыны къæпхæнты æрыгæтты хсæн. Ерыстæ цыдысты Нарткалайы. Архайдта дзы 120 адæймаджы нæ бæстæйы 18 регионæй. Нæ командæйы уыдысты уæлæмхасæн ахуырады республикон центры минæвæрттæ Полина Полякова, Джыккайты Давид, Давид Вартанян, стæй Цыбырты Валерий Алагиры сывæллæтты сфæлдыстады центрæй. Не спортсментæ равдыстой хорз бæрæггæнæнтæ. Уæлахиздзаутæ систы дыууæ къæпхæны. Цыбырты Валерий фæуæлахиз фыццаг къæпхæны, дыккаджы та бацахста дыккаг бынат. Полина Полякова райста «æвзист майдан» фыццаг къæпхæны, дыккаджы та сси уæлахиздзау. Ирыстойнаг дыууæ майданы хицæуттæ сты Авиамоделон спорты Уæрæсейы æрыгæтты иугонд командæйы уæнгтæ. Ныр сæхи цæттæ кæнынц Дунейы чемпионатмæ. Уыдзæн Францийы. Ерыстæм лæппуты цæттæ кæнынц педагогтæ Илья Поляков æмæ Марзойты Игорь.
