Куыстытæ райдыдтой сæрды райдиан. Ныридæгæн уал сцалцæг кодтой трассæйы 5 километры
Цæгат Ирыстоны бындуронæй цалцæг кæнынц Транскамы 23 километры уаццаг. Куыстытæ райдыдтой сæрды райдиан. Ныридæгæн уал сцалцæг кодтой трассæйы 5 километры. Проектмæ гæсгæ баивдзысты 25 дондзæуæн хæтæлы, фæуæрæхдæр кæндзысты машинæтæн цæуæг фæндаг 9 метры онг, стæй дзы 19 рацæуæны. Фæндаггон кусджытæ сараздзысты 1 километр æмæ 500 метры уæлæты цæуæг, æмæ 400 метры бынты цæуæг къултæ. Уымæй дарддæр сæвæрдзысты 26 квадратон метры фидар хызтæ. Уый фадат ратдзæн трассæ дурзæйтæй æмæ Æрыдоны цæугæдонæй бахъахъхъæнынæн. Фæндаггон змæлды æдасдзинады тыххæй ма специалисттæ сæвæрдзысты 21 километры æфсæнбетон бырутæ æмæ рухсгæнæн фæндаггон нысантæ. Алагиры районы хъæутæ Дæллаг Уынал, Зынцъар æмæ Мызурмæ бацæуæнты та скæндзысты автобустæн æрлæууæн бынæттæ. Бындурон цалцæджы рæстæгмæ фæндаг кусы иу фарсыл. Мызуры та фæндаггон змæлдмæ бæстон кæсынц фæндæгтыл æдасæй цæуыны паддзахадон автоинспекцийы кусджытæ.
