Бæлвырд мадзæлтты пълан бафыстой республикæйы сæргълæууæджы хæстæ рæстæгмæ æххæстгæнæг Сергей Меняйло æмæ ведомствойы разамонæг Роман Артюхин
Цæгат Ирыстоны бюджеты нысанон фæрæзтæм бæстон цæст дардзæн Уæрæсейы Къазнайад. Бæлвырд мадзæлтты пълан бафыстой республикæйы сæргълæууæджы хæстæ рæстæгмæ æххæстгæнæг Сергей Меняйло æмæ ведомствойы разамонæг Роман Артюхин. Къазнайад бæлвырд кæсдзæн паддзахадон контракттæм. Сергей Меняйлойы ныхæстæм гæсгæ уый фадат ратдзæн бюджеты хæрдзтæ æргомдæр скæнынæн. Финансон цæстдард ма баххуыс кæндзæн, Цæгат Ирыстон цух цæмæй æййафы, уыдон æххæст кæнынæн. Кусæг фембæлды Роман Артюхин схорзæхджын кодта вице-премьеры хæстæ рæстæгмæ æххæстгæнæг Ужегаты Аланы. Лæвæрд ын æрцыд Федералон къазнайы уæлдæр хæрзиуæг – граф Васильевы майдан.
