Ног ифтонгарз республикæ райста ацы фæззæджы
Цæгат Ирыстоны дарддæр æвæрынц лифтытæ бирæуæладзыгон хæдзæртты æмæ медицинон куыстуæтты. Ног ифтонгарз республикæ райста ацы фæззæджы. 100 кабинæйы ифтонг сты нырыккон домæнтæм гæсгæ. Ныртæккæ уал сæвæрдтой 50 лифты. Уыдон кусынц фæлварæн хуызы. Иннæтæ та сæвæрдзысты афæдзы кæронмæ. Уæ зæрдыл уын æрлæууын кæндзыстæм — ног лифтытæ сæвæрдтой, Сергей Меняйло æмæ нæ республикæйæ рацæуæг Дзиуаты Алыксандры хсæн цы бадзырд уыдис, уый фæрцы. Сæдæ лифты нæ республикæйæн радтой лæвар. Ныртæккæ та карачаровы заводы специалисттæ æрвылбон цæст дарынц, ифтонгарз куыд æвæрынц, уымæ. Цæттæдзинады документ алы лифтæн дæр ратдзæнис цæстдарæг оргæн. Бæлвырддæр радзурдзæн Касаты Наирæ.
Ногдзинæдтæм Доваторы проспекты ацы бирæуæладзыгон хæдзары цæрджытæ рагæй æнхъæлмæ кастысты. Лифтытæ дзы ивын райдыдтой æрæджы. Алы бацæуæны цур дæр ног кабинæ, æдæппæтæй сты 6. Фотобарьертæй уæлдай дзы ис сæрмагонд панельтæ æмæ рухсытимæ æрхæцæнтæ. Иу ныхасæй, алцыдæр цæрджыты удæнцойдзинадæн.
Карачаровы машинæтæ аразæн заводы минæвæрттæ куыстытæн мониторинг кæнынц алы къуыри дæр. цы 100 лифты райстой, уыдонæй ныридæгæн æвæрд æрцыди 50. Иннæтæ монтаж скæндзысты декабры кæронмæ. Куыстытæм сæ цæст дарынц лæггæдты компани «Комфорт-лифт»-ы специалисттæ дæр.
Монтаж чи кæны, уыдоны куыстытæ æмтгæй банымадтой хорзыл. Фæлæ дзы гыццыл фиппаинæгтæ дæр разынди. Куы сæ сраст кæной, уæд ма сæм æркæсдзысты ноджыдæр иу хатт. Сæйраг хæс – æппæт техникон домæнтæн дзуапп дæттын.
Ацы хæдзары æдæппæтæй ис 169 фатеры æмæ 9 уæладзыджы. Лифтытæй пайда кæнынц, зæгъæн ис, æмæ иууылдæр. 36 азмæ ам лифтытæ иу хатт дæр ивд не рцыдысты. зæгъы Хъайтыхъты Валентинæ. Цæры 6-æм уæладзыджы. Йæ ныхæстæм гæсгæ-иу раздæр кабинæмæ бацæуын адæймаг тæрсгæ дæр кодта.
Ног лифтытæ уал кусынц тесты хуызы. Специалисттæ сын хатдзæг куы скæной, уæд сæ эксплуатацийы æххæстæй ратдзысты. Лифтытæ ивынц медицинон куыстуæтты дæр. 7-æм поликлиникæйы уал сæвæрдтой 2 лифты. Рады лæууы 3-аг дæр.
Поликлиникæйы лифтытæ ивд нæ уыдысты 34 азы. Арæх-иу кусгæ дæр нæ кодтой. Куыстуат лæггад кæны бирæ адæмæн. Се хсæн куыд ацæргæ адæм, афтæ сывæллæттæ дæр. Бæстыхай у 4 уæладзыгон, арæзт у 4 блокæй. Карджын адæмы-иу дохтырæй иннæмæ цæуынæн фæхъæуы цалдæр уæладзыгыл æрзилын, бирæты бон та уый нæу. Фæлæ уый ивгъуыды баззад. Ног лифтытæ уавæр сраст кодтой. Фæфылдæр ис уæзы бæрц дæр. Ныр лифтæн йæ бон сисын у 630 кг онг.
Ног лифтытæ республикæмæ ссыдысты ацы фæззæг. Лифтыты хæдзарад сног кæнын къухы бафтыд Республикæйы Сæргълæууæг Сергей Меняйло æмæ Карачаровы машинæтæ аразæн заводы разамонæг Дзиуаты Алыксандр бадзырд куы бафыстой, уæд. 100 ног лифты регионæн радтой лæвар.
