Программæмæ гæсгæ, специалисттæ ивынц асфальт, æвæрынц бандæттæ æмæ нырыккон рухсгæнæнтæ
Иугонд Уæрæсейы партион проект æххæст кæнгæйæ, Цæгат Ирыстоны дарддæр аивгонд цæуынц æхсæнадон территоритæ æмæ хæдзæртты кæртытæ. Программæмæ гæсгæ, специалисттæ ивынц асфальт, æвæрынц бандæттæ æмæ нырыккон рухсгæнæнтæ. Афтæмæй гоæрты арæзт цæуы æнцонвадат тыгъдад. Фарон Дзæуджыхъæуы саив кодтой 18 æхсæнадон территорийы. Сæ хæрзхъæддзинад сын сбæрæг кодтой партийы минæвæрттæ. Бæлвырддæр хабæрттæ радзурдзæн Фидараты Маринæ.
Къостайы проспекты цæрæн хæдзæртты хсæн цъæх фæлысты зонæ саив кодтой фарон. Бынæттон цæрджыты ныхæстæм гæсгæ раздæр ацы территори уыд бырæттæй дзаг. Ныртæккæ та дзы ис асфальтæй къахвæндæгтæ, бандæттæ æмæ рухсытæ. Парти «Иугонд Уæрæсе»-йы минæвæрттæ бынаты бафиппайдтой æнæкарст кæрдæг, стæй урнæты нымæц дæр фаг нæу.
Активисттæ сбæрæг кодтой, Московскийы уынг æмæ Къостайы проспект кæм баиу вæййынц, уыцы сквер дæр. Хæстæг хæдзæртты цæрджыты ныхæстæм гæсгæ, изæрыгон уарзынц ам сæ фæллад суадзын. Ис сæм æрмæстдæр иунæг курдиат – чи нæ фæхæцыд, уыцы талатæ баивын.
Морских Пехотинцевы æмæ Владикавказскийы уынгтæ кæм баиу вæййынц, уыцы фæз дæр, бирæ азты фæстæ сног кодтой. Цалдæр азы фонтантæ нæ куыстой. Фарон сæ сцалцæг кодтой, сæ алыварс сæвæрдтой къæйдуртæ, æмæ баивтой донцъирæнтæ. БАМы районы цæрджытæн у уарзондæр фæлладуадзæн бынат, æмæ та ногæй йæхимæ лвасы адæмы.
Проектмæ гæсгæ зæронд асфальт баивтой брусчаткæйæ, сæвæрдтой дзы бандæттæ æмæ нырыккон рухсгæнæнтæ. Цъæх фæлысты зонæтæ фæфылдæр сты. Фæлæ проектмæ хаст чи не рцыд, уыцы уаццæгтæм базилын нысан кæны Дзæуджыхъæуы администраци. Ацы фарстамæ дæр Иугонд Уæрæсейы уæнгтæ кæсынц бæрнон цæстæй.
Титовы уынджы аллейæ саив кодтой æххæстæй. Ам фылдæр ис хи хæдзæрттæ. Бынæттон цæрджыты ныхæстæм гæсгæ сын раздæр сыхæгтимæ сыгъдæг уæлдæфы абадыны фадат нæ уыди. Уымæн æмæ территори уыд тынг базилинаг.
Парти «Иугонд Уæрæсе»-йы регионалон хайады минæвæрттæ алы аз дæр мониторинг кæнынц, проект «горæты æнцонвадат архайд» æххæст кæнгæйæ, цы æхсæнадон зонæтæм æмæ хæдзæртты кæртыты территоритæм базылдысты, уыдонæн. Уыимæ хынцынц республикæйы цæрджыты курдиæттæ. Ацы хатт сбæрæг кодтой, 2020 æмæ 2021-æм азты кæмæ базылдысты, уыцы бынæттæ. Цы фарстатæ сæвзæрд, уыдоныл æвæстиатæй бакуыстой Дзæуджыхъæуы администрацийы специалисттимæ.
Ивгъуыд аз Дзæуджыхъæуы саив кодтой 18 æхсæнадон территорийы. Уыйбæрцмæ базилдзысты ацы аз дæр. Специалисттæ зæгъынц, нæ горæт цас рæсугъддæр æмæ сыгъдæгдæр кæны, уыйас арæхдæр æрцæуынц вандализмы акттæ дæр.
Проект «Горæты æнцонвадат архайд» нæ республикæйы æххæстгонд цæуы 2017-æм азæй фæстæмæ. Уыцы мгъуыдмæ Цæгат Ирыстоны саив кодтой 600 хæдзары кæрты æмæ 150 æхсæнадон территорийы. Æмхæццæ бюджетæй сын радих кодтой 1 миллиард сомæй фылдæр. Территоритæ æвзарыны хъуыддаджы активонæй архайынц цæрджытæ сæхæдæг. Ацы аз республикæйы базилдзысты 42 æхсæнадон фæзмæ æмæ 50 кæртмæ. Иннæ азмæ объекттæ равзарæн та ис ныртæккæ. Уый тыххæй хъæуы хъæлæс кæныны процедурæйы бацархайын.
