Ацы хатт Сергей Меняйлойы разамындæй æркастысты Æрæфы районы æмæ Дзæуджыхъæуы бюджеттæм
Цæгат Ирыстоны дарддæр кусынц муниципалитетты 2022-æм азы бюджеттæ саразыныл. Ацы хатт Сергей Меняйлойы разамындæй æркастысты Æрæфы районы æмæ Дзæуджыхъæуы бюджеттæм. Æрæфы районы администрацийы разамонæг Лагкуты Омар куыд радзырдта, афтæмæй муниципалитет иннæ аз фæнд кæны райсын 485 милуан сомы æфтиаг. Бахардз кæнынмæ та хъавы 522 милуан сомы. Хæрдзтæн сæ сæйрагдæртæ уыдзысты бюджеты къабазы кусджытæн мызд фидын, артаг æмæ энергетикæйы лæггæдтæн фиддонтæ, стæй республикæ æмæ муниципалон нысанон программæтæ æххæст кæнын. Иннæ хæрдзтæм та кæсдзысты районы бюджеты хъомысыл æнцой кæнгæйæ. Дзæуджыхъæуы бюджеты проектмæ куы æркастысты, уæд сбæрæг ис, бирæ хæрдзтæ йæм хаст кæй не рцыдысты, уый. Уыдонимæ къæвдадæтты канализацийы æмæ Терчы былгæроны проекты арæзтæдтæ, стæй Жуковскийы парчы рацарæзт. Сергей Меняйло профилон ведомствæтæн бабар кодта, цæмæй уыцы нысантæн ссарой фæрæзтæ.
