Специалисттæ ныртæккæ бавнæлдтой Алагиры районы Дагомы кувæндоны рацарæзтмæ
Цæгат Ирыстоны дарддæр цæттæ кæнынц Аланийыл саргъауыны 1100 азы кадæн мадзæлттæм. Специалисттæ ныртæккæ бавнæлдтой Алагиры районы Дагомы кувæндоны рацарæзтмæ. Наукон проект царды рауадзыныл аныхас кодтой Гæбуты, Хъараты, Агънаты, Себетты, Хъуылаты æмæ Хестанты мыггæты минæвæрттимæ. Историон цыртдзæвæнæн сцалцæг кæндзысты йæ цар, хъæдын дуар æмæ дурын быру. Аразджытæ фæнд кæнынц кувæндоны рагон фæлгонц æмæ комулæфт бахъахъхъæнын. Уæ зæрдыл уын æрлæууын кæндзыстæм, цалдæр азы размæ хъæппæрисджын къорд йæхи тыхтæй базылд культурон объектмæ, фæлæ сæ бон иуæй иу аивгæнæнтæ бахъахъхъæнын не ссис.
Ныртæккæ та рацарæзты фæрцы бæстыхайæн раздахдзысты йе ддаг бакаст. Проектæн скодтой паддзахадон историкон-культурон экспертизæ. Рацарæзты куыстытæ фæуыдзысты ацы аз.
