Алкæмæн дæр фадат ис медицинон æркаст скæнынæн, уыимæ – лæвар
Цæгат Ирыстоны дарддæр цæуы адæмы диспансеризаци. Алкæмæн дæр фадат ис медицинон æркаст скæнынæн, уыимæ – лæвар. Диспансеризаци цæуы дыууæ къæпхæнæй. Пациентмæ исты аипдзинад куы рабæрæг кæной, уæд æй арвитынц сæрмагонд дохтырмæ, бындурондæр иртасæн куыст скæнынмæ. Бæлвырддæр хабæрттæ радзурдзæн Чехойты Фатимæ.
Сæкæры æмæ холестирины бæрзæнд раиртасын, кардиограммæ скæнын, туджы æмæ цæстыты æлхъывдад сбарын. Козаты Жаннæйыл кæд 60 азы цæуы, æмæ йæм иугæндзон низтæ кæд бæррæггонд никуы *рцыд, уæддæр медицинон æркаст ацæуы алы аз дæр. Зæгъы, фæткмæ гæсгæ процедурæтæ, ома экспресс иртæстытæ скæнынц тагъд, сæйрагдæр та – лæвар.
Рынчын адæймагмæ байхъусын æмæ йæ йе *нæниздзинад иртасынмæ арвитын у терапевтты хæс. Диспансеризаци цæуы 2 къæпхæны. Раздæр рынчынтæн скæнынц скрининг. Уый хатдзæгтæм гæсгæ снысан кæнынц хъæугæ мадзæлттæ. Уыцы фадатæй нырма бирæтæ нæ пайда кæнынц, зæгъынц дохтыртæ.
Фарон диспанзеризаци Дзæуджыхъæуы 7-æм поликлиникæйы ацыдысты 21 мин адæймаджы. Уæд дохтыртæ рабæрæг кодтой 3 мин низы. Медицинон кусджытæ арæхдæр раиртасынц зæрдæйы æмæ ахсæны низтæ. Рагацау рабæрæг кæнынц сæкæрниз æмæ онкологи дæр. Фарон поликлиникæйы фæзынд ног фæлтæрддзинад – диспансеризаци аразын райдыдтой куыстуæтты. Уый тыххæй курдиат бадæттын хъæуы регистратурæмæ. Дзæуджыхъæуы 7-æм поликлиникæйы диспансеризацийы ацæуынæн адæмæн арæзт цæуынц æнцон уавæртæ – дохтыртæ бадынц хицæн бæстыхайы, уый руаджы медицинон иртæстытæ цæуынц тагъддæр.
Медицинон кусджыты ныхæстæм гæсгæ, диспансеризаци фадат дæтты низ рагацау рабæрæг кæнынæн. Хæстæгдæр поликлиникæмæ дохтырмæ бацæуынæн хи ныффыссын хъæуы, уый тыххæй спайдагæнæн ис «Паддзахадон лæггæдты» порталæй. Кусгæ чи кæны, уыцы адæмæн закъонмæ гæсгæ хъуамæ лæвæрд цæуа, мыздыл чи нæ фæбæрæг уыдзæн, ахæм уæгъд бон.
