Фатертæ дæттынц сидзæр сывæллæттæн, æмæ æнæ ныййарджыты æххуысæй чи хъомыл кæны, ахæм кæстæртæн
Цæгат Ирыстоны дарддæр цæуы ног цæрæнуæттæй дæгъæлтæ дæттыны хъуыддаг. Фатертæ дæттынц сидзæр сывæллæттæн, æмæ æнæ ныййарджыты æххуысæй чи хъомыл кæны, ахæм кæстæртæн. Ног цæрæнуæттæ фæзындысты Весеннийы уынджы. Сæхи агъуыстытæй дæгъæлтæ райстой 18 адæймаджы. Ацы цаумæ æнхъæлмæ кастысты 10 азæй фылдæр. Ахæм æхсызгон цауы фæдыл сын раарфæ кодтой республикæйы хицауады сæрдары хæдивджытæ Бокоты Эльбрус æмæ Тугъанаты Ларисæ. Ног фатертæй дæгъæлтæ раттынæй дарддæр ма бæрнон кусджытæ арфæйы ныхæстæ загътой профилон ведомствойæн æмæ аразджытæн, ацы куыстмæ зæрдиаг æвæрæн кæй бахастой, уый тыххæй. Кадджын мадзалы фæстæ се ппæт дæр федтой ног цæрæнуæтты хæрзхъæддзинад æмæ уавæртæ. Уæвгæ, сидзæр сывæллæттæн фатертæ дæттыны куыст, Цæгат Ирыстоны Сæргълæууæджы хъуыдымæ гæсгæ, у фыццаградон хæстæй иу. 2021-æм азмæ самал кодтой 75 фатеры.
