Уый фадат дæтты цыфæнды низ дæр рагацау раиртасынæн, стæй йæ дзæбæх кæнын райдайынæн
Цæгат Ирыстоны дарддæр цæуы цæрджыты диспансеризаци. Уый фадат дæтты цыфæнды низ дæр рагацау раиртасынæн, стæй йæ дзæбæх кæнын райдайынæн. Диспансеризаци ацæуыны тыххæй курдиат бадæттæн ис поликлиникæмæ, кæнæ та паддзахадон лæггæдты порталы уылты. Ныртæккæ диспансеризаци цæуынц республикæйы хъæуты дæр. Зæгъæм, Ставд-Дурты адæмæн лæггад кæнынц районы рынчындоны специалисттæ. Консультацитæ кæнынц лæвар. Бæлвырддæр радзурдзæн Сосранты Жаннæ.
Туджы æлхъывдад æмæ зæрдæйы куыст базонын, пациентмæ байхъусын æмæ йын дарддæр йæ низ раиртасынæн гæнæнтæ саразын. Стæвд-Дурты амбулаторийы цæуы диспансеризаци. Годжысаты Зауыры тыхсын кæны аллергийæ æмæ стджыты рыст.
Медицинон кусджытæ Ставд-Дуртæм æрбацыдысты Елхотæй. Диспансеризаци арæзт цæуы, рагагъоммæ раиртасын зæрдæйы низтæ, онкологи, цæстыты низтæ, улæфæнты уавæр базоныны тыххæй. Амбулаторийы нæй бæрзондтехнологон гæнæнтимæ иртæстытæ саразын, уымæ гæсгæ бирæты арвитынц Кировы районы сæйраг медицинон уагдæттæм.
Ныртæккæ ахсджиаг у алкæмæн дæр сбрæг кæнын йæ улæфæнты куыст, сыгъдæгдзинад. Фæлæ сæрмагонд аппарат – флюорограф, алы амбулаторийы нæй. Сергей Меняйло бабар кодта, цæмæй флюорографтæй æххæстгонд æрцæуой республикæйы æппæт медицинон уагдæттæ дæр. Афтæ ныр Рахизфарсы районы ис цæугæ флюорограф.
Фарныхъæуы дæр цæуы æнæмæнг кæнгæ диспансеризации. Хъæуы цæрджыты бон у райсын эндокринологы, неврологы, кардиологы æмæ гинекологы консультацитæ. Йе нæниздзинадмæ гæсгæ цæуын йæ бон кæмæн нæу, уыдонæн та аразынц сæрмагонд уавæртæ. Фадат сын ис муниципалон транспорты фæрцы дохтыртæм æрбахæццæ уæвынæн.
Специалистты ныхæстæм гæсгæ, хъыгагæн, адæм зивæггæнгæ цæуынц диспансеризаци. Дохтыры æххуыс бацагурынц исты сæ тыхсын кæнын куы райдайы, уæд.
Диспансеризацимæ хи ныффыссæн ис бынæттон поликлиникæйы, кæнæ «Паддзахадон лæггæдты» порталы уылты. Кусгæ чи кæны, уыдоны бон та у закъонмæ гæсгæ, уыцы бон райсын улæфæн бон. Уæвгæ æхæм лæвар дохтырты æркаст хъуамæ ацæуа Бæстæйы алы цæрæг дæр. 18 азæй 39 азы онг кæуыл цæуы, уыдон диспансеризаци цæуынц æртæ азмæ иу хатт. 40 азæй фылдæр кæуыл цæуы, уыцы категори та афæдз иу хатт. Дохтыртæ ма лæмбынæг æркаст аразынц, коронавирусы инфекцийæ чи хъæрзыд, уыдонæн.
