Арæзт æрцæудзæн 14-17-æм июны онг
Цæгат Ирыстоны делегаци, йæ сæргъы республикæйы Сæргълæууæг Сергей Меняйлоимæ архайдзæн Санкт-Петербурджы XXVI æппæтадæмон экономикон форумы. Арæзт æрцæудзæн 14-17-æм июны онг. Цæгат Ирыстоны хицауады ныртæккæ цæуынц цæттæгæнæн куыстытæ, ахæм егъау мадзалы архайынæн. Форуммæ цæттæ кæныны организацион фарстатыл æрныхас кодтой сæрмагонд æмбырды. Амыдта йæ хицауады сæрдар Дзанайты Барис. Йæ доклдаы экономикон рæзты министр Кучиты Зауыр куыд фехъусын кодта, афтæмæй Цæгат Ирыстон бацæттæ кæндзæн йæхи стенд. Равæрдзысты дзы нæ регионы экономикон рæзты сæйрагдæр къабæзтыл. Уыдон та сты: промышленность, инвестицитæ, туризм, агропромышленнон комплекс æмæ иннæтæ. Стенды фæзуат уыдзæн 87 квадратон метры. Йæ сæйрагдæр темæ – туристон кластер «Солнечный пояс Алании». Се ппæтæн дæр фадат уыдзæн, фидеороликты æмæ презентациты фæрцы, нæ регионы инвестицион хъомысимæ базонгæ уæвынæн. Проектты хыгъды транспортон-логистикон фарстатæй дарддæр уыдзысты – æппæт сезонты кусæг тематикон парк «Алания парк» стæй туристон-рекреацион комплекс «Къæхтысæр». Уымæй дарддæр ма уазджытæ стенды уылты базондзысты Цæгат Ирыстоны егъаудæр туристон-рекреацион комплекс «Мамысоны», уæрæсейаг хомаг аразæг заводы, Мæздæджы агрокомплексы æмæ IT-технологиты куыстуæтты тыххæй. Форумы ма нысан кæнынц республикæйы инвестицион картæ равдисын дæр. Петербурджы æппæтадæмон экономикон форум зынгæ бынат ахсы дунейы экономикæ æмæ бизнесы. Арæзт цæуы 1997-æм азæй фæстæмæ. 2006-æм азы та дзы архайын райдыдта Уæрæсейы Президент.
