Уый тыххæй республикæйы наркотикты ныхмæ къамисы радон æмбырды фехъусын кодта æхсæнадон иугæндты совет «Антинаркотический фронт Алании»-йы минæвар Юлия Душкина
Мæскуыйы Бехтеревы номыл психиатрийы æмæ неврологийы медицинон иртасæн центр баххуыс кæндзæн Цæгат Ирыстоны æмæ иннæ регионты минæвæртты социалон реабилитацийы хъуыддаджы. Ам ныхас цæуы, раздæр наркотиктæм æмхиц чи уыд, уыдоныл. Уый тыххæй республикæйы наркотикты ныхмæ къамисы радон æмбырды фехъусын кодта æхсæнадон иугæндты совет «Антинаркотический фронт Алании»-йы минæвар Юлия Душкина. Куыд радзырдта, афтæмæй ныртæккæ Хохы Санибайы арæзт æрцыдысты æппæт уавæртæ ахадгæ социалон æмæ фæллойадон реабилитацийæн. Уымæй дарддæр банывыл кодтой нæ бæстæйы иннæ регионтимæ æмгуыстад. Уый арæзт цæуы уымæн, цæмæй адæймаджы низы уацарæй ракæнын бантыса. Фæлæ Юлия Душкинайы хъуыдымæ гæсгæ, реабилитацийы фæстæ адæмæн сæ бон куысты бынæттæ ссарын зын вæййы. Битарты Вячеслав наркотиткты ныхмæ къамисы уæнгтæн бабар кодта ацы фарстайыл куыст дæттыны комитетимæ иумæ бацархайын. Реабилитацийы фæстæ хъуамæ алкæмæн дæр фадат уа куысты ныллæууынæн, æмæ йæ бинонты дарынæн. Мæздæджы районы сæргълæууæг Гугиты Геннадий та систа æндæр ахсджиаг фарста. Фæстаг рæстæг фæсивæды хсæн парахат кæны, никотин кæм ис, ахæм буаргъæдтæ. Уый тыххæй хъæуы закъондæттæн хъæппæрисыл бакусын, цæмæй карздæрæй æфхæрд цæуой, уый тыххæй, загъта республикæйы разамонæг. Æрыдоны районы сæргълæууæг Тотраты Владислав та æмбырды архайджытæн фехъусын кодта сæ муниципалон сконды лыггæнинаг фарстайы тыххæй. Советон рæстæджы Æрыдоны районы быдырты зайын кодтой гæн, сæрмагондæй промышленнон авналæнтæн. Фæлæ йæ ныр æххæстæй скуынæг кæнын не нтысы. Битарты Вячеслав загъта, хъуыддагыл хъуамæ кæй бакусой зæххы хæйтты хицæуттæ. Куы не ххæст кæной домæнтæ, уæд та административон æгъдауæй æййафдзысты æфхæрд.
