Архайдтой дзы профилон ведомствæты разамонджытæ æмæ регионы муниципалон скондты сæргълæуджытæ
Цæгат Ирыстоны фæндаггон инфраструктурæйы объектты куыстытæ куыд æххæстгонд цæуынц, ууыл ныхас цыд Хицауады сæрдар Дзанайты Барисы разамындæй æмбырды. Архайдтой дзы профилон ведомствæты разамонджытæ æмæ регионы муниципалон скондты сæргълæуджытæ. Транспорты æмæ фæндаггон инфраструктурæйы комитеты сæрдар Солиты Тариэль фехъусын кодта, профилон мадзæлттæ республикæйы паддзахадон программæтæ «Фæндаггон инфраструктурæйы райрæзт» æмæ «Хъæуты территориты комплексон райрæзт»-мæ гæсгæ æххæстгонд кæй цæуынц, уый. Премьер загъта, паддзахадон программæтæм æмæ национ проекттæм гæсгæ 62 объектæн кæй радих кодтой 4 миллиарды æмæ 800 милуан сомы. Муниципалон программæтæм гæсгæ ма арæзт æмæ цалцæггонд æрцæудзæн ноджыдæр 54 фæндаджы. Уымæн æвæрд æрцыд 330 милуан сомæй фылдæр. Регионы разамонæг Сергей Меняйло бадзырдты фæрцы федералон бюджетæй уæлæмхасæн радих кодтой 1 миллиард æмæ 500 милуан сомæй фылдæр. Æппæт мадзæлттæ хъуамæ æххæстгонд æрцæуой афоныл æмæ хæрзхъæд. Сæрмагонд æргом Дзанайты Барис аздæхта Беслæны уынгты-фæндаггон хызы рацарæзтмæ. Конд цæуы горæты райрæзты генералон пъланмæ гæсгæ. Ацы аз цалцæггæнæн куыстытæ цæуынц 16 объекты 660 милуан сомæн. Ахадгæйæ арæзт æмæ реконструкцигонд цæуынц регионалон æмæ æхсæнмуниципалон нысаниуæг кæмæн ис, уыцы фæндæгтæ. Уымæй уæлдай ма, ацы аз рацараздзысты 6 хиды ахизæны. Уымæн радих кодтой 450 милуан сомæй фылдæр. Премьер профилон комитетæн æмæ районты сæргълæуджытæн бахæс кодта, æппæт объекттыл куыстытæ куыд æххæстгонд цæуынц, уымæ лæмбынæг цæст дарын.
