Саударæн митинг арæзт æрцыд Мариинаг театры филиалы цур фæзы
Цæгат Ирыстоны фæстаг фæндараст загътой Уæрæсейы æмæ Цæгат Ирыстоны адæмон артист, оперон зарæггæнæг Бæцæзаты Юрийæн. Саударæн митинг арæзт æрцыд Мариинаг театры филиалы цур фæзы. Æрæмбырд дзы сты сæдæгай адæмтæ. Бæцæзаты Юрийыл цыд 83 азы. Стыр æвæрæн бахаста ирон музыкалон культурæйы райрæзтмæ. Фарон Мариинаг театры филиалы Дзæуджыхъæуы сбæрæг кодтой Ирыстоны «сыгъзæрин баритон»-ы сфæлдыстадон архайды 50 азы юбилей. Бирæ азты музыкалон театры солист уæвгæйæ сæххæст кодта бирæ сæйраг партитæ. 1974-æм азы Плиты Христофоры оперæ «Къоста»-йы сарæзта Хетæгкаты Къостайы сурæт. Бæцæзаты Юрийы сфæлдыстадон намысы ахсджиаг бынат ахсынц ирон героикон зарджытæ дæр. Уыд адæмты хæлардзинады Ордены кавалер, Хетæгкаты Къостайы номыл паддзахадон премийы лауреат, саккаг ын кодтой «Ирыстоны намыс»-ы майдан.
