Уый æххуыс кæндзæн сæрмагонд æфсæддон операцийы архайджыты бинонтæн
Цæгат Ирыстоны фæзынд волонтерты ног отряд «Своих не бросаем «Топаз». Уый æххуыс кæндзæн сæрмагонд æфсæддон операцийы архайджыты бинонтæн. Хæдзары сæр сцалцæг кæнын, хойраджы продукттæ, хостæ кæнæ арæзтадон æрмæджытæ балхæнын, техникæ сцалцæг кæнын. Ацы æмæ æндæр хъуыддæгтæ зынгæ фæрогдæр кæндзысты адæмы цард. Волонтертæм курдиæттæ цæуынц «Фыдыбæстæ хъахъхъæнджыты фонды» цæгатирыстойнаг филиалмæ дæр. Хъайтмазты Дзерассæ радзурдзæн бæстондæр.
Кæркуысты Ираклийы хæстон фæндаджы истори у æцæг хъæбатырдзинады дæнцæг. Йæ цард æфсæддон хъуыддагимæ сбаста. Службæ кæнын райдыдта Уæрæсейы гвардийы æфсæдты. Уый фæстæ сæрмагонд операцийы фыццаг бонтæй уыд батальон «Алани»-йы рæнхъыты. Хæстон хæс æххæстгæнгæйæ æфсæддоны машинæ минæйыл срæмыгъта. Ираклий æххуыс кодта йæ хæстон æфсымæртæн æмæ сæ бинонтæн, йæхи æххуыс куы хъуыдис, уæд. Уыцы хъуыддаг æххæст кæны абон дæр, æрмæст ныр волонтерты ног къорд «Своих не бросаем «Топаз»-ы координаторты хыгъды.
Æрбаласын хойрæгтæ кæнæ хостæ, сцалцæг кæнын техникæ, базилын хæдзармæ. Активисттæ баххуыс кæндзысты сæрмагонд операцийы архайджыты бинонтæн хæдзары куыстытæ сæххæст кæнын. Цалынмæ хæстонтæ Уæрæсейы фидæныл аудынц, уæдмæ сæ бинонты фарсмæ сты республикæйы волонтерты 3 организацийы минæвæрттæ.
Волонтерты куыстмæ ацы къабазы Кæркуысты Ираклийимæ цæст дардзысты сæрмагонд операцийы ветерантæ æмæ программæ «Ирыстоны намыс»-ы финалисттæ Годжысаты Сослан æмæ Валерий Васильев. Архайынц «Фыдыбæстæ Хъахъхъæнджыты» фонды филиалы бындурыл. «Топаз»-мæ курдиæтты иу хай цæудзæн фондмæ цы фарстатæ æрбацæуы, уыдонæй.
Къорд «Топаз»-ы волонтерты æххуыс бацагурын ис телефонæй, стæй комкоммæ – «Фыдыбæстæ Хъахъхъæнджыты» фонды филиалы кæнæ æхсæнадон организациты хæдзары.
