Мемориалты тыххæй æрмæг нымæцон хуызмæ раивыныл архайы парти «Иугонд Уæрæсе».
Историйы æвдисæнтæ дунейы алы рæтты. Цæгат Ирыстоны фæзындзæн интерактивон картæ, æмæ дзы баиу уыдзысты Фыдыбæстæйы Стыр хæстимæ баст бынæттæ. Мемориалты тыххæй æрмæг нымæцон хуызмæ раивыныл архайы парти «Иугонд Уæрæсе». Активисттæ федералон базæмæ бахæсдзысты æппæт хъуыддæгтæ, ома цыртдзæвæнты авторты нæмттæ, сæ историйы тыххæй бæлвырддзинæдтæ. Уæвгæ, нæ республикæйы чысыл не сты. Обелисктæ, стелæтæ, мемориалон фæйнæджытæ, Æнусон æртытæ æмæ æфсымæрон ингæнтæ.
Советон Цæдисы хъæбатырты аст мемориалы æрбынат кодтой Ирон аргъуаны территорийы. Рæхджы сæ фенæн уыдзæн дунейы алы ран дæр. Парти «Иугонд Уæрæсе»-йы регионалон хайады проект «Историческая память» æххæст кæнгæйæ, йæ уæнгтæ нысан кæнынц, Фыдыбæстæйы Стыр хæстимæ баст 6 сæдæ объектæй фылдæр нымæцон хуызмæ раивын.
Фыдыбæстæйы Стыр хæсты историимæ баст æппæтæй стырдæр цыртдзæвæн – Плиты Иссæйæн, стæй фронтмæ чи ацыд, Цæгат Ирыстоны паддзахадон университеты ахуыргæнджыты æмæ студентты номыл мемориалæн дæр систой сæ къамтæ, æмæ сæ бахастой базæмæ.
Ацы куыстæн хатдзæгтæ кæнгæйæ, партийы уæнгтæ скæндзысты онлайн-картæ. Уым алкæмæн дæр фадат уыдзæн нæ бæстæйы æмæ дунейы алы рæттæй цыртдзæвæнтимæ бæстондæр базонгæ уæвынæн.
Æппæтуæрæсеон проект «Я помню» æххæст кæнгæйæ, нæ бæстæйы нысан кæнынц сæдæ дыууын фондз мин мемориалæй фылдæры тыххæй информаци сæмбырд кæнын. Афтæмæй фидарæй зæгъæн ис уый, æмæ проектæн канд ахуырадон нысантæ нæй, фæлæ ма цыртдзæвæнтæм бæстон цæстдарды хæстæ дæр.
