Стæй бакусдзысты ног туристон маршрутыл
Цæгат Ирыстоны фæзындзæни фæндаггон сервисы 20 ног объекты. Стæй бакусдзысты ног туристон маршрутыл. Уый тыххæй журналисттимæ фембæлды фехъусын кодта туризмы комитеты сæрдары хæстæ æххæстгæнæг Хъодзаты Зауырбег. Ацы аз республикæ бабæрæг кодта 2 сæдæ мин адæймагæй фылдæр. Уыдонæй 7 мины 200 адæймаджы фæсарæнты цæрджытæ. Экономинон æгъдауæй ацы нымæцтæ инвестортæн сты ахъуыдыйаг. Хæстæгдæр рæстæг, республикæйы кусын райдайдзысты цалдæр стыр проекты. Комитеты разамонæг дзы фæнысан кодта, «Мамысон», этнопарк «Алания», æмæ проект «Хæххон Дыгур». Фæстаг проект царды рацæудзæн федералон программæмæ гæсгæ. Хардзгонд ыл æрцæудзæн 3 миллиард сомы бæрц, уыимæ республикон фæрæзтæ дæр. Хъодзаты Зауырбег бæстонæй радзырдта туристон информацион центры куысты тыххæй дæр. Йæ лæггæдты фæрцы туристтæ тагъд æмæ æххæст информаци исдзысты æппæт объекттæ æмæ маршрутты тыххæй. Ныртæккæ куыст цæуы республикæйы туристон гæнæнты тыххæй видеоæрмæгыл дæр.
