Уæлдæр ахуыргæнæндоны разамонæг Цæгат Ирыстонмæ ссыд сæрмагондæй Цæгат Кавказы федералон зылды физикæйы ахуыргæнджыты съезды архайынмæ
Цæгат Ирыстоны физикон-математикон къабазы рæзтыл кусæг фембæлды æрныхас кодтой республикæйы сæргълæууæг Сергей Меняйло стæй Мæскуыйы физикон-техникон институты ректор Дмитрий Ливанов. Уæлдæр ахуыргæнæндоны разамонæг Цæгат Ирыстонмæ ссыд сæрмагондæй Цæгат Кавказы федералон зылды физикæйы ахуыргæнджыты съезды архайынмæ. Цыди ацы бонты Цæгат Ирыстоны паддазхадон университеты. Мадзалы архайдтой 150 педагогæй фылдæр. Сергей Меняйло æмæ Дмитрий Ливанов æрныхас кодтой ахуырадон программæтыл, стæй скъолаты æмæ уæлдæр ахуыргæнæндæтты куыстыл. Регионы разамонæг раарфæ кодта бæрнон кусæгæн, æмгуыстадыл ахæм зæрдиаг архайд кæй цæуы, уый тыххæй. Нæ сæйраг нысан у республикæйы ахуырады æмвæзад фæбæрзонддæр кæнын. Процесс æнцон нæу, фæлæ йæм цæуæм иу къахдзæф иннæйы фæдыл кæнгæйæ. Фæстаг азты Цæгат Ирыстон активонæй фидардæр кæны хуыздæр уæрæсейаг уæлдæр ахуыргæнæндæттимæ бастдзинад. Зæрдæ дарæн ис, дарддæр дæр афтæ кæй уыдзæн, ууыл, – загъта регионы разамонæг.
Дмитрий Ливанов куыд загъта, афтæмæй физикæйы ахуыргæнджыты съезд у егъау профессионалон мадзал. Уымæй аразгæ инженерон ахуырады хæрзхъæддзинад. Уæлдай ахсджиаг у уый, æмæ куыд æппæт Уæрæсейы, афтæ Цæгат Ирыстоны дæр уæлдай æргом здæхт кæй цæуы бæлвырд наукæтæм, – загъта мæскуыйаг ахуыргæнæндоны ректор.
