Йæ куыстимæ базонгæ уæвыны тыххæй ахуыргæнæндон бабæрæг кодта республикæйы Сæргълæууæджы хæстæ рæстæгмæ æххæстгæнæг Сергей Меняйло
Цæгат Ирыстоны физикон-математикон лицейыл цæуы 70 азмæ хæстæг. Уыцы мгъуыдмæ дзы рацыд бирæ курдиатджын рауагъдонтæ. Йæ куыстимæ базонгæ уæвыны тыххæй ахуыргæнæндон бабæрæг кодта республикæйы Сæргълæууæджы хæстæ рæстæгмæ æххæстгæнæг Сергей Меняйло. Федта ма Дзæуджыхъæуы Кванториум, стæй курдиатджын сывæллæттæн цы центр арæзт цæуы, уый дæр. Кусæг балцæй разыйæ баззад, æви нæ, уый тыххæй радзурдзæн Фидараты Маринæ.
Хæдзармæ куыст Сергей Меняйлойæ райстой республикæйы физикон-математикон лицейы рауагъдонтæ. Базонын хъæуы æмуæзады æппæт уавæртæ дæр. Уыцы-иу рæстæг регионы разамонæг йæхæдæг та зонгæ кодта республикæйы физикон-математикон лицейы хъомыс æмæ гæнæнтимæ. Райдыдта физикæйы кабинетæй, уырдыгæй – математикæйы кабинет, æмæ афтæ дарддæр. Математикæйы кабинеты зонындзинæдтæм тырнынц кæстæр кълæсты ахуырдзаутæ. Фæлæ сæ алкæмæн дæр бæлвырд у, техникон уæлдæр ахуыргæнæндæттæм сæ бацæуын кæй фæнды, уый. Лæппутæн æмæ чызджытæн сæ фылдæр цæрынц республикæйы районты.
Районтæй сывæллæттæн арæзт æрцыдысты хорз уавæртæ, цæмæй сæ бон ахуыргæнæндоны уæвын уа бонæй æмæ æхсæвæй. Ацы аз ахæм фадатæй спайда кодтой 23 ахуыргæнинаджы. Æмтгæй райсгæйæ та дзы ис 30 бынаты. Фидæны аз дыууæ хатты фæфылдæр уыдзысты. Республикæйы разамонæг ма федта хæринаггæнæн блок дæр. Сихоры хæрд цæттæ кæнынц бынаты. Сергей Меняйло йе ргом аздæхта, цух цæмæй æййафынц, уыцы хъуыддæгтæм. Æдæпппæтæй хæрæндонмæ æрбацæуы 14 къласы.
Субъекты разонæг куыд бафиппайдта, афтæмæй цух æййафынц фæсарæйнæг авæзгтæ ахуыргæнæн кабинетæй. Фидæны академиктæн уый у æнæмæнг хъæугæ хъуыддаг. Ацы фарста алыг кæнын бабар кодта республикæйы ахурады æмæ наукæйы министрадæн. Стыр æргом ма аздæхта скъолайы алфамбылай æнæаивгонд территоримæ. Цæрæнуæтты-коммуналон хæдзарады, артаджы æмæ энергетикæйы министрадæн бабар кодта проектыл бакусын, бордюртæ банывыл кæнын, зæронд хæтæлтæ æмæ футболон фæзы згæ дуæрттæ баивын.
Фидæны хъуамæ фæзына физикон-математикон лицейы рæзты программæ. Уым фæнысан кæндзысты ахсджиагдæр хъуыддæгтæ. Кæцыдæр къабæзтæ фæтыхджындæр кæндзысты, кæцыдæртыл та ногæй бакусдзысты. Ныртæккæ лицейы ахуыр кæнынц 1200 адæймаджы. Ахуыргæнæндон у фидар бындур нæ республикæйы математикон ахуырады проектæн.
Сергей Меняйло ма бабæрæг кодта Дзæуджыхъæуы Кванториум дæр. Æппæт хъуыддæгтæй баззад разыйæ. Куыд загъта, афтæмæй цæгатирыстойнаг технопарк иннæ регионтимæ абаргæйæ, ницæмæй хицæн кæны, иуæй-иу фарстаты та уæвгæ дæр у хуыздæр. Республикæйы разамонæджы базонгæ кодтой 8 инженерон-техникон къабазимæ. Се ппæты дæр ис нырыккон кусæнгæрзтæ. Æмæ дзы сывæллæттæ зонгæ кæнынц физикæйы æмæ робототехникæйы сусæгдзинæдтимæ.
Ныртæккæ технопаркмæ цæуынц уыцы-иу рæстæг 800 хъомылгæнинаджы. Стæй ма дзы кусы мобилон кванториум дæр.
Республикæйы Сæргълæууæджы хæстæ рæстæгмæ æххæстгæнæг ма бабæрæг кодта, курдиатджын сывæллæттæн центры арæзтад. Цæгат Ирыстоны хъуамæ фæзына 2022-æм азы. Куыст дзы цæудзæн дыууæ хуызмæ гæсгæ: культурæ æмæ наукæ. Сергей Меняйло профилон ведомствойæн бабар кодта, проекты концепци бацæттæ кæнын. Фидæны центры лыстæг хъуыддæгтæ нæй. Арæзтады æмæ архитектурæйы министрадæн та бахæс кодта арæзтады объекттæм домæнтæ снысан кæнын. Ам ныхас цæуы объекты паспортыл æмæ йæ бынат сæхгæныныл. Уый фадат ратдзæн æппæт фæзтæн иу хуыз скæнынæн.
