Юбилярæн арфæ ракæнынмæ æрбацыдысты йе мкусджытæ, наукон æхсæнады минæвæрттæ, паддзахадон архайджытæ
Цæгат Ирыстоны гуманитарон æмæ социалон иртæстыты институты сбæрæг кодтой Тахъазты Федары 65 азы юбилей. Юбилярæн арфæ ракæнынмæ æрбацыдысты йе мкусджытæ, наукон æхсæнады минæвæрттæ, паддзахадон архайджытæ, стæй, зындгонд филолог æмæ ирон æвзаг иртасæджы сфæлдыстадыл иузæрдион чи у, уыцы адæм. Тахъазты Федар у 150 наукон куысты, стæй 20 чиныгæй æмæ монографийæ фылдæры автор. Йе сфæлдыстадон куыст баст у ирон æвзагимæ, адæмон фольклор æмæ мифологи иртасынимæ. Тахъазты Мæхæмæты фырт бирæ азты кусы Цæгат Ирыстоны гуманитарон æмæ социалон иртæстыты институты. Абон дæр зæрдиагæй æххæст кæны, кæддæр цы арфæйаг хъуыддаджы райдиан æрлæууыди, уый. Йе стыр хъуыддæгты тыххæй дзурын нæ уарзы, у хæдæфсарм æмæ цæстуарзон адæймаг. Æрыгон фæтлтæртæн дæнцæг. Ахуыргонд йæ размæ вæры ног хæстæ æмæ нысантæ. Ныр дæр æм ис ног проект.
Тахъазты Федарæн йæ бирæ азты æнæзæрдæхудт фæллойы тыххæй радтой республикæйы кадджын грамотæ. Юбиляры схорзæх кодтой Цæгат Ирыстоны закъондæттæг оргæны дæр, ирон æвзаджы рæзтмæ æгæрон æвæрæн кæй хæссы, уый тыххæй йын саккаг кодтой Парламенты кады гæххæт. Ахæм хæрзиуæг ын радта «Ирон адæмы уæлдæр совет» дæр. Стæй ма иу æхсызгондзинад. Амæй фæстæмæ Тахъазты Федар сæрбæрзондæй хæсдзæн Лескены кадджын гражданины ном.
