Йæ сæйраг нысан у – райгуырæн бæстæйы тæваг хуыздæр банкъарын, стæй Уæрæсейы алы регионты чи ахуыр кæны, уыцы студентон фæсивæды æрбангомдæр кæнын
Республикæйы Сæргълæууæг Сергей Меняйлойы уынаффæмæ гæсгæ, 11- 14-æм августы онг Цæгат Ирыстоны хæхты ацæудзæн дыккаг сæрдыгон студентон æмбырд «Æрыгон». Йæ сæйраг нысан у – райгуырæн бæстæйы тæваг хуыздæр банкъарын, стæй Уæрæсейы алы регионты чи ахуыр кæны, уыцы студентон фæсивæды æрбангомдæр кæнын. Æмбырды программæмæ хаст æрцыдысты рухстауæн лекцитæ, тренингтæ, проектон куыст аразынæй ахуыртæ. Мадзалы архайджытæм æнхъæлмæ кæсынц сæрмагонд æфсæддон операцийы архайджытимæ, æнтыстджын амалхъом адæмимæ, культурæйы архайджытимæ, спортсментимæ, блогертимæ фембæлдтытæ. Уымæй дарддæр – дæсныйадæвдисæг ахуыртæ ирон кæфтытæй, хъæзтытæ æмæ бирæ æндæр мадзæлттæ. Традицимæ гæсгæ, фæсивæдимæ фембæлдзæн республикæйы Сæргълæууæг Сергей Меняйло. Фембæлд уыдзæн æргом ныхасы хуызы. «Æрыгон» ныр дыккаг хатт суыдзæн зындгонд уæрæсейаг эксперттимæ, стæй ма фидæны куыстдæтджытимæ фембæлды фæз дæр. Уæ зæрдыл уын æрлæууын кæндзыстæм, фыццаг сæрдыгон æмбырд арæзт æрцыд 2024-æм азы пансионат «Урсдон»-ы. Архайдтой дзы 170 студенты Цæгат æмæ Хуссар Ирыстонæй, фæлæ æндæр горæтты чи ахуыр кæны, уыдон. Мадзал саразыныл бакуыстой зонындзинæдты Центр «Машук» æмæ Цæгат Ирыстоны ахуырады æмæ наукæйы Министрад. Архайыны бар дзы ис, ацы азы рауагъдонтæн, кæнæ уæрæсейаг уæлдæр ахуыргæнæндæтты студенттæн. Æппæт бæлвырддзинæдтæ æмæ регистраци скæнынæн баххæст кæнын хъæуы анкетæ 27-æм июлы онг. Фæрстытæ раттæн ис электрон постмæ arygon2025@yandex.ru.
