Ивгъуыд къуыри лæппутæ æмæ чызджытæ тренировкæтæ кодтой шахмæтты фæйнæгыл, сæхи фæлвæрдтой спорты активон хуызты, цыдысты балцыты
Цæгат Ирыстоны хæхты республикæйы æвзонг спортсментæн фыццаг хатт арæзт æрцыдысты шахмæттæй æмбырдтæ. Ивгъуыд къуыри лæппутæ æмæ чызджытæ тренировкæтæ кодтой шахмæтты фæйнæгыл, сæхи фæлвæрдтой спорты активон хуызты, цыдысты балцыты. Æмбырдтæм та æрбахуыдтой фæлтæрдджын тренерты Мæскуыйæ. Уыдон кусынц Уæрæсейы фæсивæдон иугонд командæйы хыгъды, æмæ сты федералон зылды æнтыстджындæр шахматисттæ æмæ æппæтадæмон мастертæ. Республикон æмбырдты архайдтой спортсментæ Стъараполы æмæ Краснодары крайтæй. Уазджытæ куыд бафиппайдтой, афтæмæй уыдонæн уый у хорз фадат сæхи фæлтæрддзинадыл бафтауынæн, стæй ма Ирыстоны рæсугъддзинад фенынæн. Æмбырдтæ саразыныл бакуыстой шахмæтты федераци æмæ шахмæтты скъола «Ладья».
