Уыдонæй алчидæр райсдзæн фиддон иу милуан сомы
Цæгат Ирыстоны хъæуты иннæ аз 7 адæймаджы райдайдзысты кусын «Культурæйы хъæуккаг кусæджы» программæмæ гæсгæ. Уыдонæй алчидæр райсдзæн фиддон иу милуан сомы.
Уый тыххæй йæ телеграм-каналы фехъусын кодта Сергей Меняйло. Куыд загъта, афтæмæй республикæйы æдзухдæр аразынц æмæ цалцæг кæнынц культурæйы куыстуæттæ. Æлхæд цæуынц нырыккон ифтонггæрзтæ. Фæлæ уыимæ хъæуты нæ фаг кæны дæсны специалисттæ. Программæ нысангонд æрцыд президенты уынаффæмæ гæсгæ. Йæ фæрцы хъæуты кусын кæй фæнды, уыдоны нымæц зынгæ фæфылдæр уыдзæн. Ахæм программæтæ æнтыстджынæй æххæстгонд цæуынц ахуырады æмæ медицинæйы къабазы. Домæнтæм гæсгæ, специалист хъæуы хъуамæ бакуса æппын къаддæр 5 азы, фиддонæй йæ бон спайда кæнын уыдзæн куыд æй фæнды, афтæ.
