Уый фæдыл уынаффæ бафыста республикæйы Сæргълæууæджы хæстæ рæстæгмæ æххæстгæнæг Сергей Меняйло
Цæгат Ирыстоны Хицауад æрвыст æрцыд отставкæйы. Уый фæдыл уынаффæ бафыста республикæйы Сæргълæууæджы хæстæ рæстæгмæ æххæстгæнæг Сергей Меняйло. Фембæлд министртимæ, æмæ се хсæн рауад ахадгæ ныхас.
Хицауад отставкæйы æрвыст кæй æрцæудзæн, уый æнæнхъæлæджы хъуыддаг нæ уыди. Цæгат Ирыстоны конституцимæ гæсгæ, министртæ хъуамæ сæ бартæй уæгъдгонд æрцæуой. Уый – республикæйы Сæргълæууæджы хæстæ рæстæгмæ æххæстгæнæнæджы уынаффæмæ гæсгæ. Фæлæ уыимæ цæхгæр ивддзинæдтæ не рцыд. Се ппæтæн уал баргонд æрцыд æрвылбоны фæткмæ гæсгæ кусын.
Йæ куыст Сергей Меняйло нысан кæны бæрæггæнæн мадзæлттæй райдайын. Куыд фехъусын кодта, афтæмæй хицаудзинады федералон оргæнтæ хъуамæ сбæрæг кæной ахуырады, цæрæнуæтты-коммуналон хæдзарады æмæ æнæниздзинадхъахъхъæнынады системæты архайд. Æнæниздзинадхъахъхъæнынады министрмæ та республикæйы сæргълæууæджы хæстæ æххæстгæнæг æнхъæлмæ кæсы æххæст æмæ бæстон докладимæ.
Экономикон рæзты министрадæн та Сергей Меняйло бабар кодта 3 ахсджиаг хъуыддаджы. Хи æфтиæгты пълан фæфылдæр кæнын, социалон-экономикон рæзты æмæ национ проекттæ царды уадзыны фæдыл республикон программæйы проектыл бакусын.
Национ проекттæ царды куыд æххæстгонд цæуынц, уый тыххæй Сергей Меняйлойы фæнды байхъусын республикæйы арæзтады æмæ финансты министрадты докладтæм. Республикæйы ног разамонæгмæ фарстатæ сæвзæрд, цæрджыты курдиæттимæ кусты фæдыл дæр.
Сергей Меняйло бахаста фæндон республикæйы Хицауады æмбырдтæ районты аразыны тыххæй. Йæхæдæг дæр фæнд кæны районты центртæ бабæрæг кæнын. Хицæнæй æрлæууыд, æмгъуыдтæм гæсгæ куыстытæ конд куы нæ рцæуой, уæд карз æфхæрд кæй æййафдзысты бæрнон адæм, ууыл. Кæронбæттæны Сергей Мейняло бафиппайдта – йемæ фæмбæлынмæ хи фыссын кæй нæ хъæудзæн, уый. Йæ кабинеты дуæрттæ ведомствоты разамонджытæн кæддæриддæр уыдзысты гом.
