Финансты министры хæстæ рæстæгмæ æххæстгæнæг Исахъты Олег куыд загъта, афтæмæй иннæ аз æнхъæлмæ кæсынц 25 миллиарды æмæ 721 милуан сомы æфтиагмæ
Цæгат Ирыстоны хицауады бæлвырд кæнынц 2022 азы бюджеты æууæлтæ. Финансты министры хæстæ рæстæгмæ æххæстгæнæг Исахъты Олег куыд загъта, афтæмæй иннæ аз æнхъæлмæ кæсынц 25 миллиарды æмæ 721 милуан сомы æфтиагмæ. Хæрдзты бæрц та уыдзæнис 25 миллиарды æмæ 592 милуаны. Уымæй уæлдай хæстæгдæр æртæ азмæ фæбæрæг кодтой хæрдзты æууæлтæ. Уыдонимæ бюджеты къабазы чи кусы, уыдонæн мызд, æгуыст адæмæн фарсхæцты мадзæлттæ, национ проекттæ æмæ афтæ дарддæр. Иннæ азы кæронмæ паддзахадон хæс фæкъаддæр кæндзысты 185 милуан сомы. Хицауады сæрдары хæстæ æххæстгæнæг Тускъаты Таймураз куыд загъта, афтæмæй хъуамæ ведомствæтæ æмбарой, хæрдзтæн сæ сæйрагдæртæ социалон къабазимæ баст кæй сты, уый æмæ хъæуы бацархайын социалон хæслæвæрдтæ се ппæтдæр сæххæст кæнын. Хицауады уæнгтæн та бабар кодта, цæмæй цы мадзæлттæ сбæрæг кодтой, уыдонæн саразой фæндагон картæтæ. Афæдзы кæронмæ Парламенты депутаттæ хъуамæ æркæсой бюджеты æфтиæгты хаймæ.
