Уыдон хаст æрцыдысты Цæгат Ирыстоны райрæзты программæмæ æмæ сæ æххæст кæндзысты 2030-æм азмæ
Цæгат Ирыстоны хицауады дзырдтой, нæ республикæйы экономикæ размæ чи ракæндзæн, уыцы проектты тыххæй. Уыдон хаст æрцыдысты Цæгат Ирыстоны райрæзты программæмæ æмæ сæ æххæст кæндзысты 2030-æм азмæ. Хицауады сæрдар Дзанайты Барис куыд бафиппайдта, афтæмæй проекттæ царды куы рауадзой, уæд нæ республикæйæн ратдзысты авд мин куысты бынатæй фылдæр, стæй сырæздзæн регионалон бюджеты æфтиаг дæр. Проектты егъаудæр у рекреацион комплекс Мамысон. Ныртæккæ уал сцæттæ фидæны курортмæ фæндаг, стæй сбæрæг ис, ифтонгарз кæмæй æлхæндзысты, ахæм компани. Куыстытæ цæуынц туристон комплекс Къæхтысæры дæр. Уым ныртæккæ æвæрынц коммуналон хызтæ, стæй аразынц Дæргъæвсæй Хъобанмæ фæндаджы проект. Йæ тæмæны ис Алания Парчы арæзтад. Тагъд рæстæг кæронмæ сараздзысты канатæй фæндаг, æмæ уый фæстæ ацæудзысты йæ иртæстытæ. Специалисттæ уымæй уæлдай архайынц фæлгæсæн цалхы æмæ хæххон трассæйы арæзтадыл. æмбырды æркастысты нырыккон технологитæм гæстæ фæткъуыбæлæсты цæхæрадоны проект куыд æххæстгонд цæуы, уымæ. Компани Казачий хутор бæлæстæ садзынæй уæлдай аразынц, тыллæг кæм æфснайдзысты, ахæм скълæдтæ дæр. Уым дæргъвæтин рæстæг дарæн уыдзæнис фæндзай тоннæйы дыргътæ.
