Æрдзырдтой дзы Хъамбердиаты Мысосты номыл паддзахадон премийы лауреаттыл
Цæгат Ирыстоны Хицауады сæрдары хæдивæг Тугъанаты Ларисæйы разамындæй уыд республикон къамисы æмбырд. Æрдзырдтой дзы Хъамбердиаты Мысосты номыл паддзахадон премийы лауреаттыл. Æдæппæтæй æрбацыд 5 курдиаты. 2 куысты уыдысты номинаци «Прозæ»-йы. Уыдон – Гобозты Агуындæ æмæ Цæрикъаты Оксанæ. 3 куысты та номинаци «Поэзи»-йы. Йæ архайджытæ – Бететы Фатимæ, Гæлæбаты Мурат æмæ Дарчиты Юлия. Номинаци «Драматурги»-мæ курдиаттæ нæ уыд. Къамисы уæнгтæ – РЦИ-А-йы культурæйы министрады æмæ Цæгат Ирыстоны фысджыты минæвæрттæ, литературæйы æмæ аивады зындгонд кусджытæ, уацхæсджытæ. Сусæг хъæлæсты руаджы равзæрстой хуыздæр æвзонг авторты. Хъамбердиаты Мысосты премийы аккаг ссисты Цæрикъаты Оксанæ радзырд «Уидæ раздæр Иристони», æмæ Бететы Фатимæ æмдзæвгæтæ æмæ тæлмацты æмбырдгонд «Уалдзыгон къæвдатимæ». Тугъанаты Ларисæ куыд зæгъы, афтæмæй ахæм конкурстæ разæнгард кæнынц æвзонг авторты се сфæлдыстадон фæндаг дарддæр кæныныл. Хæстæгдæр рæстæг лауреатты схорзæхджын кæндзысты кадджын уавæры. Уæ зæрдыл уын æрлæууын кæндзыстæм, Хъамбердиаты Мысосты номыл премийæ литературæйы саккаг кæнынц, 35 азы онг цы автортыл цæуы, уыдоны. Дæттынц æй афæдз иу хатт номинацитæ «Прозæ»-йы, «Поэзи»-йы æмæ «Драматурги»-йы. Премийы бæрц у 50 мин сомы.
