Хицауады æмбырд амыдта йæ сæрдар Дзанатйы Барис
Республикæйы сæргълæууæджы Уынаффæ æххæст кæнгæйæ, Цæгат Ирыстоны Хицауады уæнгтæ æрныхас кодтой туризмы Комитеты куыст бауыромыныл, æмæ йын йæ хæстæ эконмикæйы рæзты Министрады бæрны бадæттын. Хицауады æмбырд амыдта йæ сæрдар Дзанатйы Барис. Хаст æрцыд уынаффæ, сæрмагонд къамис саразыны тыххæй. Уый хъуамæ сæххæст кæна æппæт мадзæлттæ, ведомствойы куыст бауыромыны тыххæй. Комитеты раздæры кусджытæн сæ фæлтæрддзинадмæ гæсгæ фадат уыдзæн æндæр куыст ссарынæн. Уымæй дарддæр профессионалон ахуырад адарддæр кæнын республикæйы экономикæйы Министрады. Премьер-министр се ппæты зæрдыл æрлæууын кодта, федералон æмвæзады дæр туризмы къабазы хæстæ кæй раивтой нæ бæстæйы экономикон рæзты Министрадмæ. Уыцы ивддзинæдтæ хуыздæрырдæм фæзындзысты паддзахадон программæты æмæ национ проектты ахадындзинадыл, – загъта Дзанайты Барис. Хицауады æмбырды ма сфидар кодтой паддзахадон политикæйы сæйрагдæр хъуыддæгтæ 2027-æм азы онг. Финансты министры хæстæ рæстæгмæ æххæстгæнæг Оксана Карова куыд загъта, афтæмæй ахсджиаг у, цæмæй паддзахадон хæс бюджетæн æдас æмвæзадыл баззайа, уый. Фæллойы æмæ социалон рæзты министры хæдивæг Торчынты Эльвирæ радзырдта, инвалидты æхсæнадон организацитæн субсидитæ дæттыны мадзæлтты тыххæй. Алы аз дæр сын радих кæнынц фæрæзтæ, сæ хæрдзтæ сæхгæнынæн. Ахсджиаг ма у, йе нæниздзинад хъыгдард кæмæн у, ахæм адæмæн алывæрсыг æххуыс кæнын, – бахынцта Хицауады Сæрдар.
