Уый тыххæй зæгъынц æнæниздзинадхъахъхъæнынады министарды минæвæрттæ
Цæгат Ирыстоны ис æмбæлгæ препараттæ æмæ кусæнгæрзтæ, сæрмагондæй сæкæрнизæй рынчын адæмæн. Уый тыххæй зæгъынц æнæниздзинадхъахъхъæнынады министарды минæвæрттæ. Санкцитæ нæ хынцгæйæ, æппæт дунейы инсулин аразджытæ фидарæй зæрдæ бавæрдтой, уæрæсейаг базарадимæ æмгуыстад кæй не рлæудзæн, уымæй. Фæлæ уæддæр республикæйы рынчынтæ, сæхи ныхæстæм гæсгæ, зындзинæдтæ æййафын райдыдтой. Цы у сæвзæрд уавæры аххосаг, уый тыххæй радзурдзæн Фидараты Маринæ.
Анастасия Тарасьянц ныр мæйы бæрц йæ бон райдайы иухуызон. Алы райсом дæр бæрæг кæны афтекты сайттæ. Агуры инсулин, помпæйæн кусæнгæрзтæ æмæ тестытæ глюкометрæн. Фæлæ дзуапп вæййы иу – афтекты не сты.
Льготæтæм гæсгæ хостæ исынимæ къулымыпытæ уыд раздæр дæр. Инсулин æмæ æндæр хъæугæ æрмæг фæстиат кодта. Уæдæ-иу афтекты дæр æппынæдзух нæ уыдысты. Ивгъуыд азы кæрон Анастасияйæн æрбарвыстой стыр къопп помпæйы кусæнгæрзтимæ. Æмæ йæ ныртæккæ сбæлвырд кæнын хъæуы цас фаг ын уыдзысты, уый.
Анастасияйæн сæкæрнизы диагноз сæвæрдтой, афæдз æмæ йыл æрдæг куы сæххæст, уæд. Низы фыццаг типмæ гæсгæ инсулины уколтæ хъæуы æппынæдзухдæр кæнын. Помпæйы фæрцы та препарат буармæ цæуы æнæрлæугæйæ. Цалдæр мæйы фæстæ æрыгон чызгæн йæ запастæ куы фæуой, уæд æй хъæудзæн, зындæр архайд чи у æмæ ма æдасдзинады домæнтæ къаддæр чи æххæст кæны, ахæм мадзæлттæм рахизын. Ам канд льготæтæм гæсгæ хостыл нæ цæуы ныхас. Цы фæсарæйнаг препараттæ ма баззад афтекты, уыдоны аргъ та сырæзт дыууæ хатты.
Æппæтæй фылдæр тæссаг у уый, æмæ дарддæры архайд æбæрæг кæй у. Анастасия хъаст кæны, бæлвырд дзуапп райсын йæ бон кæй нæу, уымæй. Ома уыдзæн ма препараттæ æви нæ. Ахæм уавæры сты республикæйы бирæ цæрджытæ. Уыимæ канд иснулинимæ нæ. Рынчынтæ хъаст кæнынц, химиотерапияйы препараттæй дæр цух кæй æййафынц, уымæй. Афтекты не сты. Агурынц сæ, сæ бон кæмæн куыд у, афтæ. Суанг ма фæсарæнтæй дæр заказ скæнынц.
Уый нæ хынцгæйæ, республикæйы æнæниздзинадхъахъхъæнынады министрады зæгъынц – æппæт æмбæлгæ препараттæ æмæ кусæнгæрзтæ æлхæнынц фæткмæ гæсгæ. Цæгат Ирыстонимæ æмгуыстад иу компани дæр нæ фехæлдта.
Æнæниздзинадхъахъхъæнынадмæ цæстдарды управленийы дæр хæст сты ацы хъуыдыйыл. Препараттæй цух ничи æййафдзæн. Хицæн позицитæ кæй нæй ныртæккæ, уый та, чи зоны æмæ баст у уыимæ, æмæ адæм хостæ фæстæдæрмæ æлхæнынмæ кæй фесты. Стæй ма сæ ласыны хъуыддаг дæр кæй фæкъуылымпы, уыимæ. Уый тыххæй ног онлайн-проекты портал «Объясняем РФ»-ы фехъусын кодта территориалон оргæны разамонæг Ольга Давыдова
Кæд æмæ республикæйы афтектæ хостæй ифтонггонд цæуынц, уæддæр экспертты хъуыдымæ гæсгæ фидæнмæ прогнозтæ зын кæнæн сты. Нæ бæстæйы ис инсулины æмæ æндæр хъæугæ препаратты уæрæсейаг аналогтæ. Фæлæ сæм сæкæрнизæй рынчынтæ рахиздзысты, æви нæ, уый нырма бæлвырд хъуыддаг нæу.
