Уый тыххæй аппаратон æмбырды фехъусын кодта ахуырады æмæ наукæйы министр Алыбекты Эллæ
Цæгат Ирыстоны иу скъола æмæ сывæллæтты рæвдауæндæтты 8 къорды æхгæд æрцыдысты карантинмæ. Уый тыххæй аппаратон æмбырды фехъусын кодта ахуырады æмæ наукæйы министр Алыбекты Эллæ. Фæлхасадмæ цæстдарды управленийы бæрæггæнæнтæм гæсгæ, республикæйы æхснырсæгæй рынчынты нымæц эпидемиологон къæпхæнæй чысыл фылдæр у. Грипп иу хатт дæр нæ рабæрæг. Ивгъуыд къуыри короновирусæй фæрынчын 49 адæймаджы. Ныхас цыд æхсæнадон транспорты куыстыл дæр. Афтæ республикæйы сæргълæууæджы ныхæстæм гæсгæ, адæм хъаст кæнынц 11-æм маршруты куыстыл. Уæлдайдæр та фæлладуадзæн бонты. Сергей Меняйло загъта, кæй хъæуы мониторинг кæнын æмæ æмбæлгæ мадзæлттæ æххæст кæнын. Вице-премьер Платы Альбинæ фехъусын кодта, Ног азы агъоммæ кæй бацæттæ кæндзысты бæллицты заз бæлæстæ. Республикæйы разамонæг загъта, акцитæ кæй хъæуы рагацау саразын, уæлдай æргом та аздахын сæрмагонд æфсæддон операцийы архайджыты сывæллæттæм.
