Нæ республикæйы номæй Красноярскмæ ацæудзысты 20 спорсменæй фылдæр
Цæгат Ирыстоны иугонд командæ уæгъдибар хъæбысхæстæй йæхи цæттæ кæны æппæтадæмон турнирмæ – Иван Ярыгины Кубок. Нæ республикæйы номæй Красноярскмæ ацæудзысты 20 спорсменæй фылдæр. Дзæуджыхъæу ацы бонты сæмбырд кодта нæ бæстæйы алы регионтæй спортсменты. Нæ командæимæ иумæ тренировкæтæ кæнынц Казахстаны иугонд командæйы атлеттæ дæр. Иван Ярыгины Кубок хонынц «Дунейы чысыл чемпионатæй». Арæзт æрцæудзæн 29-æм январæй 1-æм февралы онг. Чехойты Фатимæ радзурдзæн бæстондæр.
Кæд хæстæ егъау сты, уæддæр фæллад уадзынæн рæстæг нæй. Цæгат Ирыстоны хъæбысхæсты иугонд командæ йæхи цæттæ кæны зымæджы сæйраг ерыстæм. У æртыккаг, кæронбæттæн къæпхæн. Красноярскмæ Иван Ярыгины Кубок рамбулынмæ республикæйæ ацæудзысты 20 спортсменæй фылдæр. Се *хсæн – зындгонд богæлттæ æмæ чемпионаты сæ арæхстдзинад æмæ курдиат фыццаг хатт чи равдисдзæн, ахæм æрыгон спортсментæ.
Цæттæкæнынады 3-аг къæпхæны хицæндзинад – богæлтты *хсæн ерыс. Дзæуджыхъæу ацы бонты сæмбырд кодта хъæбысæйхæсджыты бæстæйы алы регионтæй æмæ хæстæг фæсарæнтæй. Республикæйы командæйы уæнгтимæ тренировкæтæ кæнынц спортсментæ Уæрæсейæ, стæй Казахстаны иугонд командæйы уæнгтæ. Цæттæкæнынады ахæм хуыз æххуыс у се *ппæтæн дæр. Хъæбысæйхæсджытæ сæхи æнтысджынæй цæттæ кæнынц чемпионатмæ, зæгъынц тренертæ.
Ирон богæлтты æмбырдтæ фыццаг хатт цæуынц республикæйы спортивон цæттæдзинады Центры. Агъуыст сæрмагодæй ифтонг у уæгъдибар хъæбысæйхæсты домæнтæм гæсгæ. Байтыдтой дзы 6 гауызы – уый та фадат дæтты æппæт спортсментæн уыцы иу рæстæг, кæрæдзийы нæ хъыгдаргæйæ, тренировкæтæ кæнынæн.
Иван Ярыгины Кубок хъæбысæйхæсджытæ хонынц «Дунейы чысыл чемпионат «. У зæххы къорийы зындгонддæр турнир. Сызгъæрин майдан дзы хуымæтæг хæрзиуæг нæу, фæлæ у хæрзхъæддзинад æмæ, национ иугонд командæ раззагдæр суæвын кæй фæнд кæны, уый æвдисæг. Æппæтадæмон турнир хъæбысхæстæй традицимæ гæсгæ цæудзæн Красноярскы 29-æм январæй 1-æм февралы онг. Гауызыл сæ цæттæдзинад равдисдзысты тыхджындæр богæлттæ алы бæстæтæй. Кубок уыдзæн æвзарæн ерыс Европæйы чемпионаты архайынмæ.
