Ацы аз Дзæуджыхъæуы кусынц 60 базарадон бынаты
Цæгат Ирыстоны йæ тæмæны бацыд харбызтæ уæй кæныны сезон. Ацы аз Дзæуджыхъæуы кусынц 60 базарадон бынаты. Уыимæ уæй кæнынц куыд бынæттон, афтæ æрбаласгæ продукци. Фæлхасадмæ цæстдарды республикон управленийы специалисттæ се ппæты зæрдыл лæууын кæнынц, харбызтæ æлхæнын не мбæлы машинæтæй, фæндаджы былгæрæтты. Уый æнæниздзинадæн у тæссаг. Бæлвырддæр хабæрттæ радзурдзæн Чехойты Фатимæ.
Ралæууыд харбызты æмæ неситы рæстæг. Ныридæгæн сын адæмæй бирæтæ сбæрæг кодтой сæ ад. Роял Вердиев сæ уæй кæны 5 азы дæргъы. Дыууæ къуырийы размæ сæ сласта Дагестанæй. Продукцийы хæрзхъæддзинадыл æууæнды.
Специалисттæ сидынц адæммæ, цæмæй харбызтæ æмæ неситæ фæндаджыбыл машинæтæй ма *лхæной. Ахæм продукци æнæниздзинадæн æххуыс нæ фæуыдзæн. Æлхæнгæйæ сæ лыг кæнын дæр нæ хъæуы. Ахæм харбызты æмæ неситы фæзыны сальмонеллæ æмæ ботулизмы бактеритæ. Сæ хæрзхъæддзинад сын бæрæг кæнынц республикæйы фæлхасадмæ цæстдарды Управленийы специалисттæ. Уыдон продукцийæн скæнынц лабораторон иртæстытæ, адæмæн раргом кæнынц уарзон гага куыд *взарын хъæуы, уый сусæгдзинæдтæ.
Дзæуджыхъæуы ацы аз харбызтæ æмæ неситæ адæмæн сæ бон балхæнæн уыдзæн 60 бынаты. Горæты администраци аразы аукцион. Уый хатдзæгтæм гæсгæ сбæрæг вæййынц уæйгæнæн бынæттæ.
Сентябры кæронмæ уыдзæн харбызты æмæ неситы сезон. Республикæйы фæлхасадмæ цæстдарды управленийы кусджытæ куыд фæбæрæг кодтой, уымæ гæсгæ харбызты æмæ неситы хæрзхъæддзинады тыххæй нырма иу адæймагæй дæр хъаст нæ райстой.
