Рахизфарсы районы хуымзæххыты фæзуат та у 24 мин гектары
Цæгат Ирыстоны йæ тæмæны сты уалдзыгон быдырон куыстытæ. Боныхъæд нæ фæбæрæг регионы хуымзæххыты уавæрыл. Хъæууон хæдзарады министрадæй куыд фехъусын кодтой, афтæмæй ацы аз нысан кæнынц хуымзæххыты фæзуæттæ фæфылдæр кæнын. Уæлдай тынгдæр цы культурæтæ парахат кæнынц, уыдонæн. Хоры æмæ хъæдуры культурæты хъомыс у 807 мин тоннæйы онг. Рахизфарсы районы хуымзæххыты фæзуат та у 24 мин гектары. Дыууæ къуыримæ аграритæ нысан кæнынц тауыны куыстытæ фæуын. Бæлвырддæр радзурдзæн Хъайтмазты Дзерассæ.
Ацы фермерон хæдзарады Хуымæллæгмæ хæстæг тауынæн радих кодтой 800 гектары. Ам тауынц нартхор, фылдæр – уæрæсейаг хуыз – 291-æм. Къæвдатæ арæх кæй уыд, уый тыххæй куыстытæ бахъуыд адарддæр кæнын. Ныртæккæ аграритæн баззад байтауын 300 гектарæй къаддæр. Фарон ацы быдыртæй систой нартхоры тыллæг 700 тоннæйы бæрц. Ацы аз дæр фермертæ æнхъæлмæ кæсынц ахæм бæрæггæнæнтæм.
Нартхор тауынц Беслæнмæ хæстæг дæр. Ам ис 350 гектары хуымгæнæн зæххытæ. Кооперативы æвзарынц фæсарæйнаг хуызтæ – «Пионер» æмæ «Монсанто». Рахизфарсы районы раззагдæр агроном Туаты Зелимхан куыд зæгъы, афтæмæй ацы хæдзарады азæй азмæ районы æппæтæй хъæздыгдæр тыллæг вæййы. Иу гектарæй исынц хор 100 центнеры бæрц.
Æдæппæтæй Рахизфарсы районы ис 24 мин гектары хуымгæнæн зæххытæ. Уыдонæй 11 мины ахсы нартхор. Районы ма зайын кæнынц уалдзыгæнд культурæтæ дæр – мæнæу, рапс, сойæ æмæ хурмæзилæг. Кæд æмæ боныахаст тауæг кампани къуылымпы кодта, уæддæр аграритæ куыстытæ æххæст кæнынц нысангонд фæткмæ гæсгæ.
Туаты Зелимханы ныхæстæм гæсгæ, фарстайыл куыст цæуы. Ныридæгæн скъахтой аразгæ цад быдыртæ донæй пырх кæнынæн. Районы байтыдтой хуымгæнæн зæххытæн сæ 90 процентæй фылдæр. Фæнд кæнынц хæстæгдæр 2 къуырийы æмгъуыдмæ куыстытæ фæуын.
