Сæ курдиат дзы раргом кодтой скъоладзаутæ æмæ студенттæ
Цæгат Ирыстоны кадджын уавæры байгом сывæллæтты театралон фестиваль «Бонвæрнон». Сæ курдиат дзы раргом кодтой скъоладзаутæ æмæ студенттæ. Æдæппæтæй 65 сфæлдыстадон коллективы бацæттæ кодтой сæ постановкæтæ ирон æвзагыл. Се ппæт дæр баст сты Стыр Уæлахизы 80 азы бонимæ. Фестивалы сæйраг нысан у – ирон культурæ парахат кæнын. Хъайтмазты Дзерассæйæн ныхасы бар.
Ахæм стыр мадзал гом кæнын у кадджын, фæлæ уыимæ бæрнон хъуыддаг, зæгъынц Дзæуджыхъæуы 7-æм скъолайы æвзонг артисттæ. Сывæллæтты театралон фестиваль «Бонвæрнон»-мæ бацæттæ кодтой равдыст «Уый не *рыздæхт тохы быдырæй». Ныффыста йæ скъолайы директоры хæдивæг Цæллагкаты Светланæ. Уæвгæ, ацы ахуыргæнæндоны ис хъæздыг театралон традицитæ. Архайы дзы цалдæр театралон студийы 3 æвзагыл – ирон, уырыссаг æмæ англисаг.
Сывæллæтты театралон фестиваль «Бонвæрнон» арæзт цæуы ирон æвзагыл. Йæ темæ баст у Стыр Уæлахизы 80 азимæ. Архайынмæ курдиæттæ балæвæрдтой 65 сфæлдыстадон къорды – республикæйы скъолатæй æмæ астæуккаг ахуыргæнæндæттæй. Фестивалы фыццаг бон жюрийы размæ се сфæлдыстад рахастой горæты 6 скъолайы минæвæрттæ. Тæрхонгæнджытæ куыд загътой, афтæмæй аргъ кæнын кæддæриддæр зын вæййы, уæлдайдæр та сывæллæтты курдиатæн.
Театралон фестиваль «Бонвæрнон» арæзт æрцыд Цæгат Ирыстоны сæргълæууæджы хæслæвæрдмæ гæсгæ. Æвзарæн къæпхæн ахæсдзæн 4 мæйы. Цæудзæн Дзæуджыхъæуы æмæ республикæйы районты. Финалистты та сбæрæг кæндзысты майы. Мадзал саразыныл бацархайдтой республикæйы культурæйы, стæй ахуырады æмæ наукæйы министрадтæ. Фидæны фестивалы архайынмæ фæнд кæнынц уæлдæр ахуыргæнæндæтты театралон къордты дæр æрбахонын.
