Гала-концерты уæлахиздзаутæн раарфæ кодта республикæйы сæргълæууæг Битарты Вячеслав
«Иры Фарн-2019». Цæгат Ирыстоны кæронмæ æрхæццæ хихъæппæрисадон къордты дыккаг æркаст. Гала-концерты уæлахиздзаутæн раарфæ кодта республикæйы сæргълæууæг Битарты Вячеслав. Дыккаг аз фестиваль æрæмбырд кæны Дзæуджыхъæуæй æмæ районтæй сфæлдыстадон коллективтæ, суанг дæрддзæф хъæутæй дæр. Ацы аз конкурс-æркаст баст уыд ирон литературæйы бындурæвæрæг, поэт, публицист, Ирыстоны номдзыд хъæбул Хетæгкаты Къостайы 160 азы бонимæ. Призты иумæйаг фонд у 3 милуан сомы. Уæ зæрдыл уын æрлæууын кæндзыстæм, ацы аз мартъийы Битарты Вячеслав йæ Доклад-ныстуаны фæсидт бæрнон кусджытæм, цæмæй алывæрсыг æххуыс кæной курдиатджын сывæллæттæн. Афæдзы дæргъы æркасты архайдтой хæдахуыр коллективтæ, уыимæ алы жанрты: кафт, зарæг, инструменттыл цагъд, театралон аивад, нывкæнынад æмæ аив дзырд. Аргъ та сын кодтой бæрнон жюрийы уæнгтæ.
