Мыды куысты бæркад нæ республикæйы азæй азмæ кæны фылдæр
Зæрдиаг куысты адджын бæркад… Цæгат Ирыстоны климæт тынг хорз у мыддарынæн. Мыды куысты бæркад нæ республикæйы азæй азмæ кæны фылдæр. 2022-æм азы сæмбырд кодтой 30 тонны бæрц мыд, фарон та – 33 æмæ æрдæг тоннæйы. Мыддарынад рæзы падзахады «Агростартап»-ы руаджы. 2019-æм азæй нырмæ 36 мыдгæсы райстой 38 милуан сомы. Не сфæлдыстадон къорд бабæрæг кодта Æрæфы районы мыдгæсты. Бæлвырддæр хабæрттæ радзурдзæн Чехойты Фатимæ.
Дыууæ азæй фылдæр Тауаситы Тамерлан дары мыдыбындзытæ. Ацы куыст ын зонгæ у йæ сабибонтæй нырмæ. Хæрзчысылæй Тамерлан уыдта, йæ дада арæхстджынæй куыд архайдта мыды чыргъæдтимæ, уый. Уымæ гæсгæ йæхæдæг дæр ахуыр кодта мыдыбындзытæм зилын æмæ мыд æмбырд кæныныл. Рагæй хъуыды кодта мыдгæс суæвыныл. Йæ фæнд сæххæст йæ фæлладуадзæны рæстæг.
Республикæйы хъæууон хæдзарады министрады æххуысæй Тауаситы Тамерлан сси мыдгæс. Мыды чыргъæдтæ балхæнынæн райста иу милуан сæдæ мин сомы. Ныридæгæн Тамерланы 3 зæххы хайыл ис 52 мыды чыргъæды. Йæ ныхæстæм гæсгæ сæ хицæнтæй уымæн дары, цæмæй сæ адджын бæркад, фылдæр уа, уый тыххæй. Мыд у тын хæрзхъæд. Алы мыды чыргъæдæй рауайы 10-15 литры мыд. Тауаситы Тамерлан фæнд кæны йæ хæдзарад фæуæрæхдæр кæнын.
Тамерланы ныхæстæм гæсгæ, мыдыбындзытæн аразын хъæуы сæрмагонд уавæртæ. Алкæцымæдæр хицæнæй хъæуы зилын, цæмæй ма рынчын кæной. Каст цæуы, донæй цас æххæст сты, уымæ дæр. Ахсджиаг у афойнадыл æфснайын мыды фæзгъæртæ æмæ мыд сисын. Уый уæззау куыст у. Алы мыды чыргъæды дæр ис 10 мин бындзы. Мыдгæсты ныхæстæм гæсгæ, Цæгат Ирыстоны климæт хорз у Карникæ дарынæн. Чыргъæды мыдыбындзытæ цæрынц сæхи иерархимæ гæсгæ. Алы бындзæн дæр ис сæрмагонд бынат æмæ боны фæтк. Кæрæдзийæн фембарын кæнынц, кæдæм тæхын хъæуы, уыцы бынæттæ.
Мыды чыргъæдтæм зилынмæ Тамерланæн æххуыс кæны йæ сыхаг Чегаты Виктор. Уый 5 азы дæргъы кæны мыддарыны куыст. Фæлтæрдджын мыдгæс æнæвгъауæй лæвар кæны йæ зонындзинæдтæ Тамерланæн. Викторы фæнды, цæмæй кæрæдзийæн æххуысгæнгæйæ, нæ республикæйы райрæза ацы къабаз.
2019 азæй нырмæ национ проект «Чысыл æмæ астæуккаг амалхъомдзинад»-ы фæлгæты æххæстгонд цæуы цæгатирыстойнаг мыдгæстæн æххуысы программæ. Уæдæй нырмæ дзы спайда кодтой 36 адæймаджы. Хъæууон хæдзарады министрады куыд бафиппайдтой, уымæ гæсгæ ацы къабаз бонæй бон уæрæхдæр кæны.
Цæгат Ирыстоны боныхъæд тынг хорз у мыды чыргъæдтæ дарынæн. Бынæттон адджинаг тынг бауарзтой нæ республикæйы цæрджытæ. Аргъ ын кæнынц нæ бæстæйы иннæ регионты дæр.
