Уый тыххæй аппаратон æмбырды фехъусын кодта фæлхасадмæ цæстдарды цæгатирыстойнаг Управленийы разамонæг Тыбылты Алан
Цæгат Ирыстоны коронавирусæй рынчынты нымæц та ногæй фæфылдæр. Уыимæ алы кары адæмы хсæн. Уый тыххæй аппаратон æмбырды фехъусын кодта фæлхасадмæ цæстдарды цæгатирыстойнаг Управленийы разамонæг Тыбылты Алан. Уыимæ рынчындæтты ацы низимæ адæмы нымæц, ивгъуыд къуыриимæ абаргæйæ, нæ фæфылдæр. Ныртæккæйы онг республикæйы рынчындæтты COVID-19-ы диагнозимæ ис 59 адæймаджы, – фехъусын кодтой æнæниздзинадхъахъхъæнынады министрады. Профилон ведомствойы разамонæг Тебиаты Сослан куыд фехъусын кодта, афтæмæй 22-æм августы онг тагъд æххуысы клиникон рынчындоны хъуамæ эксплуатацийы радтой ног туаггуыры станцæ. Уымæй дарддæр системæтæ скусын кæнынмæ хъавынц Æрыдоны æмæ Мæздæджы. Æмбырды ма ныхас цыд транзитон транспорты уавæрыл дæр. Афтæ Арвы комы фæндагыл ныртæккæйы онг сæ радмæ æнхъæлмæ кæсынц 2060 транзитон машиæнæйæ фылдæр. Уый тыххæй фехъусын кодта вице-премьер Томайты Ирбег. Куыд радзырдта, афтæмæй уым ныртæккæ лæууы 1893 уæзласæн машинæйы. Ивгъуыд суткæмæ арæныл дыууæрдæм ацыд 4400 машинæйы. Уый у Уæллаг Ларсы уадзын пункты гæнæнтæй 9 хатты фылдæр. Хицауады сæрдар Дзанайты Барис ма се ппæты ргом аздæхта, фæстаг рæстæг адæмæй бирæ хъæстытæ кæй цæуынц æхсæнадон транспортыл, уымæ. Маршрутон такситæ изæрыгон нæ фаг кæнынц Дзæуджыхъæуæй Беслæнмæ. Уыцы ахсджиаг фарстайыл æвæстиатæй бакусын бабар кодта транспорты æмæ фæндаггон инфраструктурæйы комитетæн.
