Уый тыххæй фехъусын кодта Уæрæсейы фæлхасадмæ цæстдарды управленийы разамонæг Анна Попова
Цæгат Ирыстоны ковиды пневмонияйы бæрц, нæ бæстæйы иннæ регионтимæ абаргæйæ, у уæлдæр. Уый тыххæй фехъусын кодта Уæрæсейы фæлхасадмæ цæстдарды управленийы разамонæг Анна Попова. Уый баст у, низ æрæджийау кæй рабæрæг кæнынц, уыимæ, æмæ бабар кодта республикæйы æнæниздзинадхъахъхъæнынады системæйы куыст фæкарздæр кæнын ацы къабазы. Эпидемиологон уавæрыл ныхас цыд Оперативон штабы æмбырды. Амыдта йæ Уæрæсейы Хицауады сæрдары хæдивæг Татьяна Голикова. Кæд ныртæккæ скъоладзаутæ æмæ фæсивæд дистанцион хуызы ахуыр кæнынц, уæддæр ОРВИ æмæ гриппæй рынчынты нымæц кæны фылдæр. Сергей Меняйло загъта, æнæрлæугæйæ кæй цæуы санитарон-эпидемиологон уавæр фæхуыздæр кæныныл куыст. Ахæм архайд цæудзæн дарддæр дæр. Регионы разамонæг ма фехъусын кодта, ныртæккæ республикæйы 6 ковид-стационары кæй ис 750 бынаты. Уыдонæй 83 сты реанимационтæ. Куы бахъæуа, уæд бынæтты нымæц фæфылдæр кæндзысты. Поликлиникæты æмæ районты центрон рынчындæтты кусынц амбулаторон центртæ. Уымæй дарддæр пациенттæн хостæ баласынц сæ хæдзæрттæм. Вакцинаци ацыдысты республикæйы цæрджыты 46%.
