Официалон балцы программæмæ гæсгæ премьер-министр, Беслæны зæдты горæты дидинджытæ сæвæрыны фæстæ, бабæрæг кодта, социалон æгъдауæй ахсджиаг объекттæ
Цæгат Ирыстоны кусæг балцы уыд Уæрæсейы Хицауады Сæрдар Михаил Мишустин. Уый уыд ахсджиаг цау нæ республикæйæн. Официалон балцы программæмæ гæсгæ премьер-министр, Беслæны зæдты горæты дидинджытæ сæвæрыны фæстæ, бабæрæг кодта, социалон æгъдауæй ахсджиаг объекттæ. Базонгæ Беслæны рæзты генералон пъланимæ. Федералон бæрнон кусæг уыд сывæллæтты ног музыкалон скъолайы. Кадджын уавæры йæ байгом кодтой ивгъуыд азы. Скъола хæссы Уæрæсейы аивæдты сгуыхт архайæг Махъоты ацæмæзы ном. Михаил Мишустин йæхæдæг базонгæ скъоладзауты курдиатимæ. Сывæллæттæн загъта бузныг, ахæм цæттæдзинад кæй равдыстой, уый тыххæй. Фæстæдæр бабæрæг кодта Беслæны сывæллæтты сфæлдыстады хæдзар. Уымæй дарддæр ма премьер-министр абалц кодта Горæтгæрон районы егъау дыргъдарæн куыстуат «Казачий хутор»-мæ. Уый хаст æрцыд нæ республикæйы раззагдæр инвестпроектты хыгъдмæ.
