Бæрæгбоны заз æмæ нæзы бæлæстæ нæ республикæмæ æрбаластой Саратовы, Ульяновскы, Самарæйы æмæ Пензæйы облæсттæй.
Ног азы агъоммæ нæ горæт саив кодтой кæрдæгхуыз заз æмæ нæзы бæлæстæ. Цæгат Ирыстоны кусын райдыдтой заз бæлæсты базартæ. Бæрæгбоны фидауц балхæнæн ис цалдæр раны. Раздæр азты куыд уыди, афтæ ныр дæр æппæтæй егъаудæр базарадон армукъатæ байгом сты Барбашовы уынджы Олимпаг парчы районы, Хъесайы-фырты, Чапаевы, Московскийы, Леоновы уынгты, стæй Доваторы проспекты. Ног азы бæрæгбоны символ балхæнæн ис 400 сомæй æмæ фылдæр. Заз бæлæсты базартæ кусдзысты 31-æм декабры онг.
Ног азмæ бонтæ нымайгæйæ, заз бæлæсты армукъамæ æрбацыд Дзæуджыхъæуы цæрæг Наталия Михайленко. Сæ бинонты цы традици ныффидар, уымæ гæсгæ ма Ног азы бæрæгбонмæ дыууæ къуырийы куы баззайы, уæд хъуамæ сæ хæдзары, æнæмæнг, фæзына нæзы бæлас. Хъуамæ йæ хæрздæф парахат кæна æмæ сæм гуырын кæна бæрæгбоны æнкъарæнтæ. Сылгоймаг йæхæдæг куыд зæгъы, афтæмæй-иу йæ сабибонты дæр афтæ уыди.
Заз æмæ нæзы бæлæстæ нæ республикæмæ æрбаластой Саратовы, Ульяновскы, Самарæйы æмæ Пензæйы облæсттæй. Стæй ма фæсарæнтæй дæр — Данийæ, Канадæйæ æмæ Голландийæ. Уæдæ сæ алæмæты хæрздæф республикæйы цæрджытæн балæвар кæндзысты, Хуссар Ирыстонæй кæй æрбаластой, уыцы заз бæлæстæ дæр.
Алы бæласæн дæр ис йæхи аргъгæнджытæ. Фæлæ ацы куыст рагæй чи кæны, уыцы уæйгæнджытæ хорз æмбарынц, адæм фылдæр кæй равзарынц, ахæм бæлæстæ. Зæгъæм, хъырымаг, кæнæ Палласы нæзы бæлас. Специалисттæ зæгъынц, æппынæдзухдæр вæййы цъæх, æмæ йæ хуыз нæ сафы. Афтæмæй саив кæндзæн цыфæнды хæдзар дæр. Ныр æвддæсæм аз дохтыр-травматолог Плиты Марат Ног азы агъоммæ райсы отпуск, цæмæй республикæйы цæрджытæн бæрæгбоны æнкъарæнтæ лæвар кæна, уый тыххæй.
Заз бæлæсты армукъатæ кусдзысты алы бон дæр æртын фыццæгæм декабры онг, райсомы фарастæй изæры дæс сахатмæ. Ног азы сæйраг символ балхæнæн ис, цыппар сæдæ сомæй райдай æмæ фæндзай мин сомæй фæуы. Фæлæ йæ куы лхæнай, уæд хъуамæ зонай, бæлас кæд акалдтой, уый. Цас фæстæдæр, уыйас фылдæр фæлæудзæн, æмæ йæ судзинтæ не згъалдзæн. Ныридæгæн дæр бæрæгбоны фидауц бирæтæ саив кодтой сæ хæдзæртты.
