Уый тыххæй фехъусын кодтой фæлхасадмæ цæстдарды республикон управленийы
Цæгат Ирыстоны къуыримæ коронавирусæй рынчынты нымæц фæфылдæр 14%. Уый тыххæй фехъусын кодтой фæлхасадмæ цæстдарды республикон управленийы. Уæдæ уыцы мгъуыдмæ стационартæм дæр адæм фылдæр цæуынц. Уыимæ 90 проценты уавæрты низ æнæ симптомтæй вæййы. Специалисты амындмæ гæсгæ, æдасдзинады сæрмагонд мадзæлттæ аразын нырма нæ хъæуы.
Прививкæ скæныны размæ профилактикон æркаст. Буары тæвд æмæ сатурацийы сбарст хъуамæ равдисой æнæниздзинады уавæр. Туркменистаны гражданин Ануш Рахмедов цæры Дзæуджыхъæуы. Раздæр скодта прививкæ, ныр æрбацыд дыккаг скæнынмæ.
Прививкæ скæнын фæнд кæнынц, низы фæстæ вирусмæ иммунитет кæмæ фæзынд, уыдон дæр. Низы ныхмæ буаргъæдты æмвæзадмæ цæст дарын хъæуы.
Прививкæ скæнын кæй фæнды, ахæмтæ ис, кæд æмæ тынг бирæ не сты, уæддæр. Вакцинацийы темпытæ рæзынц. Процедурон кабинеты æвдисынц, «Спутник V»-йы 2 компоненты дæр дарынц инструкцимæ гæсгæ уазалгæнæн камерæйы.
Ныртæккæ вакцинаци кæнынæн у йæ тæккæ афон, зæгъынц Дзæуджыхъæуы фыццаг поликлиникæйы. Уымæн æмæ рынчынты нымæц фылдæр кæны. Ног штамм «Кентавр»-ы хицæндзинад у, низ æнцондæрæй кæй цæуы, фæлæ уый сывæллæттæм нæ хауы.
Тагъд медицинон æххуысы республикон клиникон рынчындоны ковидон хайады дæр зæгъынц, короновирусимæ госпитализацигонд рынчынты нымæц фæфылдæр. Арæхдæр вæййынц хроникон низтимæ адæм. Се *хсæн – зæрдæйы низтæ, игæры бур низ, нарддзинад, сæкæрниз. Ахæм рынчынтæм ковид уæззаудæр хуызы вæййы.
Фæлхасадмæ цæстдарды управленийы куыд зæгъынц, афтæмæй, кæд, раздæрау, ковид-19-æй фылдæр рынчын кæнынц 30-æй 50 азы онг кары адæм, уæддæр низ тынгдæр фæзыны 65 азæй фылдæр кæуыл цæуы, уыдоныл. Уымæ гæсгæ ацы кары адæм хъуамæ се *нæниздзинадмæ лæмбынæгдæр уой. Уæлдайдæр та, ног штаммы симптомтæ кæй аивтой, уый хынцгæйæ. Рæуджытыл чысыл фæзыны. Ныр цæст дарын хъæуы, уæллаг улæфæнтæм æмæ респираторон низты æууæлтæм. Уыимæ сæрмагонд фæтк нæма нысан кæнынц.
Эпидемиологон уавæрмæ дарддæр цæст дардзысты. Тæссаг къорды чи ис, уыдонæн специалисттæ амонынц, бирæ адæм кæм вæййы, уырдæм ма цæуын, арæхдæр къухтæ сапонимæ æхсын, стæй маскæтæ дарын, уæлдайдæр та дзæбæхгæнæн-профилактикон æмæ социалон лæггады кусæнуатты.
