Ацы хъæуы бавзæрстой фæлварæн проект
Цæгат Ирыстоны мæгуырдзинадимæ тох кæныны мадзæлттæ райдыдтой Раздзогæй. Ацы хъæуы бавзæрстой фæлварæн проект. Фæллойы æмæ социалон рæзты министрады специалисттæ æрзылдысты се ппæт бинонтыл дæр, æмæ æрæмбырд кодтой алкæйы финансон уавæры тыххæй дæр информаци. Цæрджыты адих кодтой æртæ категорийыл. Фылдæр æргом здæхт æрцыди, се нæниздзинад хъыгдард кæмæн у, уыцы адæммæ, æмæ бизнесы архайын кæй фæнды, уыдонмæ. Ныртæккæ хъæуы уавæр куыд у, уый базоныны тыххæй Раздзогмæ ацыди не сфæлдыстадон къорд.
Октябры Челæхсаты бинонты цы дыгæрдыгтæ фæзынди, уыдон æртæ мæйы фæстæ радтой фæлтæр. Ныр банхъæлмæ кæсын хъæуы уалдзæгмæ. Уæд фæзындзæни æхсыр дæр, æмæ аходæнæн стъолтыл уыдзæни æхсыр æмæ нæлхæ.
Ахæм хæдзарæдтæ Рздзоджы ис 14. Кæмæ иу стур, кæмæ дыууæ. Цы дыууын фондз стуры радтой, уыдонæй иуæндæсæн ныридæгæн фæзынди фæлтæр. Æппæт фарстатæ радтæн ис районы хъæууон хæдзарады управленийы специалисттæм. Ацы ногдзинæдтæ царды æххæстгонд цæуынц, республикæйы фæллойы æмæ социалон рæзты министрады цы программæйыл кусынц, уый фæрцы. Раздзог сын сси фæлварæн проекты хуызы. Ацы хъæумæ ныртæккæ цæуы уæлдай цæстдард. Зæгъын хъæуы уый, æмæ дзы ис бирæ фæкæсынхъуаг бинонтæ. Паддзахады æххуысыл чи сразы ис, уыдонæн сæ хæдзарады æфтиæгтæй сæ бон пайда кæнын у куыд сæ фæнды, афтæмæй. Сæйраг домæн у, бинонтæн цы стур радтой, уый хъуамæ бинонтæм фæуа 5 азы.
Министрады специалистты хъуыдымæ гæсгæ, программæ царды æххæстгонд цæуы æнтыстджынæй. Адæмы царды уавæртыл фæзынди хорзырдæм. Уымæ гæсгæ, проект тагъд рæстæджы парахатгонд æрцæудзæн иннæ хъæутыл дæр.
