Уæлдай цæстдард цæуы патриотон хъомыладмæ
Рæнхъытæй цыд, тактикæйæ ахуыртæ, медицинон æххуыс хæсты уавæрты. Цæгат Ирыстоны медицинон колледжы студентты æрмæст адæмы сæ низтæй дзæбæх кæныныл нæ ахуыр кæнынц, фæлæ зын уавæрты æххуыс кæныныл дæр. Уæлдай цæстдард цæуы патриотон хъомыладмæ. Бæлвырддæр радзурдзæн Чехойты Фатимæ.
Цæгат Ирыстоны медицинон колледжы ацы кабинеты анатомийы æрмæджыты бæсты ис хæцæнгарзы макеттæ æмæ противогазтæ. Ам фидæны медицинон кусджыты ахуыр кæнынц хæстон уавæрты архайынмæ. Студенттæ зонгæ кæнынц æдасдзинады бындуртæ æмæ Фыдыбæстæ хъахъхъæныны мадзæлттимæ. Уыцы зонындзинæдтæ цымыдисаг сты фыццаг курсонтæн.
Æдасдзинады бындуртæ æмæ Фыдыбæстæ хъахъхъæнынад студенттæн амоны отставкæйы булкъон, Дзæуджыхъæуы ветеранты советы сæрдар Гецаты Валерий. Ис æм хæстон фæлтæрддзинад – 35 азæй фылдæр службæ кодта *фсады: Чехословаки, Дард Скæсæн, Фæскавказ, йæ интернационалон хæс æххæст кодта Хæстæг Скæсæны. Сæйрагдæр у студенттæн профессионалон зонындзинæдтæ дæттын, фæлæ сæ патриотон хъомылад дæр къаддæр ахсджиаг хъуыддаг нæу, зæгъы фæлтæрдджын ахуыргæнæг.
Ныр ма уал студентты хæс у теоретикон хай сахуыр кæнын. Фæстæдæр та ралæудзæн æфсæддон цæттæдзинады рæстæг: рæнхъытæй цыд, тактикæйæ ахуыртæ, медицинон æххуыс кæнын хæстон уавæрты. Зонгæ сæ кæнынц Калашниковы хæцæнгарзы макетимæ. Хъуамæ йæ базоной райхалын æмæ сæмбырд кæнын сæрмагонд рæстæгмæ. Ахуыргæгæндоны цæсты гагуыйау хъахъхъæнынц Цæгат Ирыстоны хъæйтартимæ баст æрмæджытæ. Ам фенæн ис паддзахы рæстæджы, Фыдыбæстæйы Стыр хæсты æмæ сæрмагонд æфсæддон операцийы хъæбатырты портреттæ. Медицинон колледжы 48 рауагъдоны ныртæккæ сты сæрмагонд æфсæддон операцийы зонæйы. Нæ рох кæнынц сæ ахуыргæнæндон, фадат сын куы фæвæййы, уæд бабæрæг кæнынц сæ ахуыргæнджыты, балæвар сын кæнынц сæ хæстон дзаумæттæ.
Патриотизмы æмæ лæгдзинады дæнцæг студенттæн у колледжы директор Реуазты Таймураз. У хæстон цауты ветеран, хорзæхджын æрцыд 32 паддзахадон хæрзиуæгæй. 2008 азы Хуссар Ирыстонмæ Гуырдзыйы ныббырсты рæстæг иннæ дохтыртимæ, фельдшертимæ æмæ медицинон хотимæ Джавæйы госпиталы баххуыс кодтой сæдæгай æфсæддонтæн æмæ бынæттон цæрджытæн. Уыцы бонтæ Таймураз никуы ферох кæндзæн. Хæстон цауты тыххæй дзурын хъæуы кæстæртæн, цæмæй зоной истори æмæ ивгъуыд рæстæджы рæдыдтæ макуы *руадзой, зæгъы ахуыргæнæндоны директор.
Ног аз колледжы кæрты æвæрд æрцæудзæн стеллæ Фыдыбæстæйы Стыр хæстмæ ахуыргæнæндонæй чи ацыд, уыдоны кадæн. Сты 500 адæймаджы. Уæлахизы бонмæ та фæнд кæнынц Музей байгом кæнын. Фенæн дзы уыдзæн, сæхæдæг бирæ азты дæргъы кæй фембырд кодтой, ахæм хæсты рæстæджы экспонаттæ.
