Дæргъвæтин командировкæйы размæ сын скодтой дæсныйадæвдисæг ахуыртæ
Цæгат Ирыстоны мидхъуыддæгты министрады радон фæлтæр та командировкæйы ацыд Мæздæджы районмæ. Уым сæрмагонд уавæрты сæ службæ æххæст кæндзысты Цæгат Кавказы федералон зылды дæлхайæдтæ æмæ мидхъуыддæгты рæстæгмæйы оперативон къордты иугонд командæтимæ. Мæздæгмæ æрвыст æрцыдысты ведомствæйы алыхуызæн службæты фæлтæрдджын кусджытæ. Дæргъвæтин командировкæйы размæ сын скодтой дæсныйадæвдисæг ахуыртæ. Архайдтой барадхъахъхъæнæг, службæйы сусæгдзинæдтæ базоныны, хæцæнгарзæй æхсыны, се спортивон цæттæдзинад фæхуыздæр кæныны æмæ моралон-психологон æгъдауæй фæфидардæр уæвыны ахуырты. Пъæлицæйæгтимæ ацы бонты фембæлд республикæйы мидхъуыддæгты министр, инæлар-лейтенант Андрей Сергеев. Радзырдта сын цы дæлкъордтæм сæ æрвитынц, уым службæ кæныны хицæндзинæдты тыххæй. Куыд загъта, афтæмæй алкæуыл дæр ис стыр бæрнондзинад æвæрд. Алчидæр хъуамæ æмбара æмæ æххæст кæна йæ службæйы ахсджиагдзинад æмæ йæ æххæст кæна нормæтæй ма рахизгæйæ. Пъæлицæйæгтæ сæ размæ вæрд хæстæ æххæст кæнынмæ цæттæ кæй сты, уый тыххæй фехъусын кодта министры хæдивæг пъæлицæйы булкъон Альберт Сабанаев. Информаци радта материалон-техникон ифтонгдзинады, медицинон лæггæдты, æмæ уæлæмхасæн социалон гарантиты дæттыны, стæй культурон-дзыллон мадзæлттæ аразыны тыххæй. Кæронбæттæны разамонджытæ службæгæнджытæн скодтой ныстуантæ, цæмæй сæ хæстæ сæххæст кæной æнæаипп æмæ хæрзхъæдæй, стæй сын сæ зæрдæ загъта стыр æнтыстдзинæдтæ.
